🇮🇳 कर्जत-जामखेडमध्ये उद्या तिरंग्याचा जयघोष! सभापती प्रा. राम शिंदे यांच्या उपस्थितीत १३ ऑगस्टला भव्य तिरंगा रॅली; नागरिकांनी मोठ्या संख्येने सहभागी होण्याचे आवाहन

जामखेड न्युज – – – – 

🇮🇳 कर्जत-जामखेडमध्ये उद्या तिरंग्याचा जयघोष!

सभापती प्रा. राम शिंदे यांच्या उपस्थितीत १३ ऑगस्टला भव्य तिरंगा रॅली; नागरिकांनी मोठ्या संख्येने सहभागी होण्याचे आवाहन

स्वातंत्र्यदिनाच्या पार्श्वभूमीवर कर्जत-जामखेड विधानसभा मतदारसंघात गुरुवार, दि. १३ ऑगस्ट रोजी राष्ट्रभक्तीचा जागर करणाऱ्या विविध भव्य तिरंगा रॅलींचे आयोजन करण्यात आले आहे. विधान परिषदेचे सभापती प्रा. राम शिंदे यांच्या प्रमुख उपस्थितीत होणाऱ्या या रॅलींच्या माध्यमातून नागरिकांमध्ये राष्ट्रप्रेम, तिरंग्याप्रती सन्मान आणि देशाभिमानाची भावना अधिक दृढ करण्याचा संदेश दिला जाणार आहे.

कर्जत तालुक्यातील राशीन येथे सकाळी ९.३० वाजता भव्य तिरंगा पायी रॅली काढण्यात येणार आहे. या रॅलीमध्ये प्रा. राम शिंदे प्रमुख उपस्थित राहणार असून नागरिक, युवक, विद्यार्थी आणि विविध संस्था-संघटनांचे पदाधिकारी मोठ्या संख्येने सहभागी होणार आहेत.

यानंतर सकाळी १०.४५ वाजता कर्जत शहरात भव्य तिरंगा मोटारसायकल रॅली आयोजित करण्यात आली आहे. या रॅलीतही प्रा. राम शिंदे सहभागी होणार असून, तिरंग्याच्या सन्मानासह राष्ट्रभक्तीचा संदेश देण्यात येणार आहे.
दरम्यान, जामखेड शहरात दुपारी ३ वाजता भव्य तिरंगा दौड रॅली आयोजित करण्यात आली आहे. या रॅलीत युवक, विद्यार्थी, महिला, सामाजिक संस्था, स्वयंसेवी संस्था, विविध संघटनांचे पदाधिकारी तसेच देशप्रेमी नागरिक सहभागी होणार आहेत.

स्वातंत्र्यदिनाच्या निमित्ताने आयोजित या रॅलींमधून ‘हर घर तिरंगा’, राष्ट्रप्रेम आणि राष्ट्रीय एकात्मतेचा संदेश जनमानसापर्यंत पोहोचविण्यात येणार आहे. तिरंगा हा देशाच्या अस्मितेचे आणि अभिमानाचे प्रतीक असून, त्याचा सन्मान राखत नागरिकांनी या राष्ट्रभक्तीपर उपक्रमात उत्स्फूर्त सहभाग नोंदवावा, असे आवाहन आयोजकांच्या वतीने करण्यात आले आहे.

रॅलींचे वेळापत्रक
🇮🇳 सकाळी ९.३० वा. – राशीन येथे भव्य तिरंगा पायी रॅली
🇮🇳 सकाळी १०.४५ वा. – कर्जत शहरात भव्य तिरंगा मोटारसायकल रॅली
🇮🇳 दुपारी ३.०० वा. – जामखेड येथे भव्य तिरंगा दौड रॅली
कर्जत-जामखेडमधील नागरिकांनी मोठ्या संख्येने सहभागी होऊन राष्ट्रभक्तीचा जागर घडवावा, असे आवाहन करण्यात आले आहे.