जामखेड न्युज – – – – –
दिल्लीतील विद्यार्थ्यांवरील लाठीमाराच्या निषेधार्थ २३ जुलै रोजी जामखेड बंद,
सर्वपक्षीय व सर्व विद्यार्थी संघटनांचे आवाहन
दिल्ली येथे विद्यार्थ्यांवर झालेल्या कथित पोलिस लाठीमाराच्या निषेधार्थ गुरुवार, दि. २३ जुलै २०२६ रोजी जामखेड बंदची हाक देण्यात आली आहे. या आंदोलनात सर्व विद्यार्थी संघटना तसेच विविध राजकीय पक्ष सहभागी होणार असून, नागरिकांनी स्वयंस्फूर्तीने बंदला पाठिंबा द्यावा, असे आवाहन आयोजकांनी केले आहे.
जाहीर करण्यात आलेल्या पत्रकानुसार, विद्यार्थ्यांवरील कारवाईचा निषेध नोंदवण्यासाठी सकाळी १०.०० वाजता जामखेड बसस्थानकापासून तहसील कार्यालयापर्यंत निषेध मोर्चा काढण्यात येणार आहे. या मोर्चामार्फत प्रशासनाला निवेदन देऊन विद्यार्थ्यांवरील कारवाईचा निषेध व्यक्त केला जाणार आहे.
आंदोलनकर्त्यांनी सांगितले की, विद्यार्थ्यांना शांततेच्या मार्गाने आपली भूमिका मांडण्याचा लोकशाही अधिकार असून, त्यांच्यावर करण्यात आलेली कठोर कारवाई निषेधार्ह आहे. या घटनेविरोधात तीव्र नाराजी व्यक्त करत जामखेड बंदचे आवाहन करण्यात आले आहे.
बंदच्या पार्श्वभूमीवर व्यापारी, व्यावसायिक, शैक्षणिक संस्था, सामाजिक संघटना तसेच सर्वसामान्य नागरिकांनी सहकार्य करावे, असेही आवाहन करण्यात आले आहे.
