जामखेड न्युज – –
जम्मू-काश्मीर पोलिसांनी ‘जैश-ए-मोहंमद’च्या दहशतवाद्यांचा मोठा कट उधळून लावला आहे. पोलिसांनी चार दहशतवाद्यांना अटक केली आहे. स्वातंत्र्यदिनी मोटारसायकल आयईडी स्फोट घडवून आणण्याचा मोठा कट या दहशतवाद्यांचा होता; मात्र पोलिसांच्या सतर्कतेमुळे दहशतवाद्यांचे मनसुबे प्रत्यक्षात येऊ शकले नाहीत.
ड्रोनद्वारे टाकलेली शस्त्रास्त्रे पोचविण्याचा होता प्रयत्न
जम्मू-काश्मीरमध्ये पोलिस आणि लष्कराकडून दहशतवाद्यांविरोधात मोहीम सुरू आहे. या मोहिमेअंतर्गत जम्मू-काश्मीर पोलिसांनी ‘जैश’च्या चार दहशतवाद्यांना आणि त्यांच्या साथीदारांना अटक केली आहे. हे दहशतवादी ड्रोनद्वारे टाकण्यात आलेली शस्त्रास्त्रे गोळा करून घाटीमध्ये सक्रिय असलेल्या दहशतवाद्यांना पोहोचवण्याचा कट आखत होते. इतकेच नाही, तर हे दहशतवादी स्वातंत्र्यदिनी वाहनात आयईडी लावून मोठा स्फोट घडवून आणण्याच्या तयारीत होते. त्यासह देशातील अन्य शहरातील टार्गेटची रेकीही हे दहशतवादी करत होते.
ADVERTISEMENT
मुंतजिर मंजूर या दहशतवाद्याला अटक
पोलिसांनी सुरुवातीला मुंतजिर मंजूर या दहशतवाद्याला अटक केली. मुंतजिर हा पुलवामाचा राहणारा आणि ‘जैश’चा दहशतवादी आहे. मुंतजिरकडून पोलिसांनी एक पिस्तूल, एक मॅक्झीन, 8 राऊंड काडतूस आणि दोन चीनी हॅन्डग्रेनेड जप्त केले. तो एका ट्रकच्या साह्याने शस्त्रास्त्र पुरवण्याच्या प्रयत्नात होता. पोलिसांनी तो ट्रकही जप्त केला आहे.
दहशतवाद्यांकडून ऑईल रिफायनरीची रेकी
मुंतजिरसह पोलिसांनी अजून तीन दहशतवाद्यांना अटक केली. यात इजाहर खान उर्फ सोनू खानचा समावेश आहे. सोनू हा उत्तर प्रदेशातील कंडाला इथला रहिवासी आहे. सोनूने सांगितले, की त्याला पाकिस्तानच्या ‘जैश’ चा कमांडर मनाजिर खान याने अमृतसरहून शस्त्रास्त्र गोळा करण्यास सांगितले होते, जी ड्रोनच्या माध्यमातून खाली टाकण्यात आली होती. इतकेच नाही तर त्याला पानिपत ऑईल रिफायनरीची रेकी करण्यासही सांगण्यात आले होते. या दहशतवाद्याने रिफायनरीचा एक व्हिडीओ बनवून पाकिस्तानला पाठवला होता. त्यानंतर त्याला अयोध्येतील राम जन्मभूमीची रेकी करण्यासाठी सांगण्यात आले होते; मात्र त्याला तिथे अटक करण्यात आली आहे.
