अहिल्यानगर जिल्हा बँकेच्या रणांगणात ३६९ अर्ज, ९०३ अर्जांची विक्री! दिग्गज मैदानात, काहींची माघार पहा कोणत्या तालुक्यात कोण उमेदवार
अहिल्यानगर जिल्हा मध्यवर्ती सहकारी बँकेच्या निवडणुकीची रणधुमाळी आता निर्णायक टप्प्यात पोहोचली आहे. उमेदवारी अर्ज दाखल करण्याच्या अंतिम दिवशी, सोमवार (दि. ५ ऑक्टोबर) जिल्ह्यातील राजकीय वातावरण चांगलेच तापले. जिल्हा बँकेच्या २१ संचालकपदांसाठी तब्बल ३६९ उमेदवारी अर्ज दाखल झाले असून, सात दिवसांत ९०३ अर्जांची विक्री झाली आहे. त्यामुळे बँकेच्या निवडणुकीत मोठी चुरस निर्माण झाली आहे.
अर्ज दाखल करण्याच्या शेवटच्या दिवशी अनेक आजी-माजी आमदार, खासदार तसेच सहकार क्षेत्रातील दिग्गजांनी शक्तिप्रदर्शन करत उमेदवारी अर्ज दाखल केले. सुजय विखे पाटील, मोनिका राजळे, अक्षय कर्डिले, प्रताप पाचपुते, रणजीतसिंह देशमुख यांच्यासह अनेक प्रमुख नेत्यांची नावे निवडणुकीच्या रिंगणात आली आहेत.
राम शिंदेंच्या माघारीने मोठा ट्विस्ट अर्ज दाखल करण्याच्या अंतिम दिवशी विधान परिषदेचे सभापती प्रा. राम शिंदे यांनी जिल्हा बँकेच्या निवडणुकीतून माघार घेण्याचा निर्णय जाहीर केला. मागील काही दिवसांपासून त्यांच्या उमेदवारीची जोरदार चर्चा सुरू होती. मात्र, अंतिम क्षणी त्यांनी अर्ज दाखल न करण्याचा निर्णय घेतल्याने राजकीय वर्तुळात खळबळ उडाली.
राम शिंदे यांनी मात्र आपल्या समर्थक उमेदवारांना पूर्ण ताकदीने पाठिंबा देणार असल्याचे स्पष्ट केले आहे. त्यामुळे त्यांच्या माघारीनंतर कर्जत-जामखेडच्या राजकीय समीकरणांकडे विशेष लक्ष लागले आहे.
नेवाशात गडाखांची ‘बिनविरोध’ वाटचाल जिल्हा बँकेच्या निवडणुकीत सध्या सर्वाधिक चर्चेचा मतदारसंघ ठरला आहे तो नेवासा. नेवासा तालुका विविध कार्यकारी सेवा सोसायटी मतदारसंघातून माजी मंत्री शंकरराव गडाख यांचा एकमेव अर्ज दाखल झाला आहे. त्यामुळे त्यांची बिनविरोध निवड होण्याचा मार्ग जवळपास मोकळा झाला आहे.
संगमनेरमध्ये बिनविरोधाच्या प्रयत्नांना धक्का जिल्हा बँकेची निवडणूक बिनविरोध करण्यासाठी प्रयत्न सुरू असतानाच संगमनेरमध्ये मात्र वेगळे चित्र निर्माण झाले आहे. एकनाथ शिंदे यांच्या नेतृत्वाखालील शिवसेनेकडून तीन उमेदवारांनी अर्ज दाखल केल्याने संगमनेरमधील राजकीय समीकरणे पुन्हा चर्चेत आली आहेत.
जामखेड-कर्जतवरही लक्ष कर्जत-जामखेड मतदारसंघातील राजकीय हालचालींकडे जिल्ह्याचे लक्ष आहे. या मतदारसंघात सेवा सहकारी संस्थांच्या ठरावधारकांचे मोठे महत्त्व असल्याने स्थानिक राजकीय नेत्यांनी मोर्चेबांधणी सुरू केली आहे. राम शिंदे यांच्या माघारीनंतर या मतदारसंघातील पुढील समीकरण काय राहते, याची उत्सुकता आहे.
महिला उमेदवारांचाही दमदार सहभाग यंदाच्या निवडणुकीत महिला उमेदवारांचीही मोठी संख्या दिसून आली आहे. उपलब्ध माहितीनुसार महिला प्रवर्गातून ६३ उमेदवारी अर्ज दाखल झाले आहेत. त्यामुळे महिला राखीव जागांवरील लढतीकडेही लक्ष लागले आहे.
आता छाननीनंतर खरे चित्र स्पष्ट होणार ३६९ अर्ज दाखल झाल्याने सध्या मोठी गर्दी दिसत असली तरी अंतिम उमेदवारांची संख्या यापेक्षा कमी होण्याची शक्यता आहे. ६ ऑक्टोबरला अर्जांची छाननी होणार असून ७ ऑक्टोबरला पात्र उमेदवारांची यादी प्रसिद्ध होणार आहे. त्यानंतर २२ ऑक्टोबरपर्यंत उमेदवारी अर्ज मागे घेता येणार आहेत. त्यामुळे खरी राजकीय लढत कोणाकोणात होणार, हे माघारीनंतरच स्पष्ट होणार आहे.
२ नोव्हेंबरला मतदान आणि ३ नोव्हेंबरला मतमोजणी होणार असल्याने आगामी काळात जिल्हा बँकेच्या निवडणुकीचे राजकारण आणखी तापण्याची चिन्हे आहेत.
ठळक आकडेवारी एकूण संचालकपदाच्या जागा : २१ अर्ज विक्री : ९०३ दाखल झालेले उमेदवारी अर्ज : ३६९ महिला उमेदवारांचे अर्ज : ६३ अर्ज छाननी : ६ ऑक्टोबर पात्र उमेदवारांची यादी : ७ ऑक्टोबर माघारीची अंतिम मुदत : २२ ऑक्टोबर मतदान : २ नोव्हेंबर मतमोजणी : ३ नोव्हेंबर
तालुकानिहाय प्रमुख उमेदवार — सोसायटी मतदारसंघ तालुका अकोले किरण लहामटे, शरद चौधरी, संजीवनी शिंदे, सीताराम गायकर, वैभव पिचड, रावसाहेब वाकचौरे
श्रीरामपूर करण ससाणे, सोन्याबापू शिंदे, रणजीत बनकर, सोपानराव राऊत ही नावे उपलब्ध अंतिम दाखल अर्जांच्या वृत्तानुसार आहेत; आज ६ ऑक्टोबरला छाननी सुरू असून ७ ऑक्टोबरला पात्र उमेदवारांची यादी प्रसिद्ध होणार आहे. त्यामुळे काही अर्ज बाद होऊ शकतात.
जामखेडसाठी विशेष: अमोल राळेभात, सचिन घुमरे आणि सुधीर राळेभात यांचे अर्ज दाखल आहेत.
