मी शंकर तू पार्वती; खरातनंतर आणखी एका भोंदू बाबाचा कारनामा उघड
अशोक खरात प्रकरण चर्चेत असतानाच आणखी एका भोंदू बाबाचा पर्दाफाश झाला आहे. वसईतील स्वयंघोषीत धर्मगुरूनं महिलेवर अत्याचार केल्याची बाब उघडकीस आली आहे. ‘मी शंकर, तू माझी पार्वती, असं म्हणत महिलेला आपल्या जाळ्यात ओढत तिच्यावर अत्याचार या स्वयंघोषित गुरूनं केला आहे. याप्रकरणी वसईच्या माणिकपूर पोलीस ठाण्यात बलात्काराचा गुन्हा दाखल झाला आहे. पुढील कारवाईसाठी हे प्रकरण पुण्यातील मांजरी पोलिसांकडे वर्ग करण्यात आले आहे.
मिळालेल्या माहितीनुसार 35 वर्षीय पीडित महिला पुण्यातील आहे. तिने माणिकपूर पोलिसांना दिलेल्या फिर्यादीनुसार 2023 मध्ये फेसबुकवर तिची ओळख झाली होती. आमची वसई या संस्थेचा प्रमुख असलेल्या या धर्मगुरूने पीडित महिलेच्या धार्मिक शद्धेचा गैरफायदा घेत तिच्याशी जवळीक साधली. डिसेंबर 2023 मध्ये तो तिला भेटायला पुण्यात गेला होता.
मी महादेवाचा अवतार आहे. ‘तू माझी पार्वती आहेस, असे सांगून महिलेला भुलवले. त्यानंतर तिला पुण्यातील मांजरीमधील एका लॉजमध्ये नेले. तेथे तिला गुंगीकारक पदार्थ देऊन तिच्यावर अत्याचार केला. महिलेचे काही अश्लील फोटोही काढली.
फोटोवरून तो त्या महिलेला ब्लॅकमेल करायचा. या नराधम बाबाने मे २०२५ मध्ये महिलेला वसईतील हॉटेल एक्सप्रेस इनमध्ये भेटायला बोलावून तिच्यावर पुन्हा अतिप्रसंग करण्याचा प्रयत्न केला.
दरम्यान नाशिकच्या अशोक खरात याचे प्रकरण बाहेर आल्यानंतर पीडित महिलेने हिम्मत करत आपल्या पतीला हा प्रकार सांगितला. त्यानंतर बुधवारी संध्याकाळी वसईच्या माणिकपूर पोलीस ठाण्यात ऋषिकेश वैद्य याच्या विरोधात तक्रार दाखल करण्यात आली आहे. बलात्काराची पहिली घटना पुण्यात घडली असल्याने हे प्रकरण पुण्यातील मांजरी पोलीस ठाण्याकडे वर्ग करण्यात आली आहे.
माणिकपूर पोलिस ठाण्याचे वरिष्ठ पोलिस निरीक्षक हिरालाल जाधव यांनी दिलेल्या माहितीनुसार, या प्रकरणाचा सखोल तपास सुरू आहे. पीडित महिलेने असाही खळबळजनक दावा केला आहे की, ऋषिकेश वैद्य याने स्वतःला धर्मगुरू भासवून अनेक मुलींना आपल्या जाळ्यात ओढले असून त्यांचे लैंगिक शोषण केले आहे. ‘आमची वसई’ या संस्थेचा बुरखा पांघरून अध्यात्माच्या नावाखाली चालणाऱ्या या धक्कादायक प्रकारामुळे परिसरात संताप व्यक्त होत असून, पोलिस आता इतर संभाव्य पीडितांचा शोध घेत आहेत.
