जामखेड न्युज – – – –
एकीकडे एसटी कर्मचाऱ्यांची परिवहन मंत्री आणि ज्येष्ठ नेत्यांसोबत चर्चा सुरू असताना दुसरीकडे संप (MSRTC Workers Strike) चिघळविणाऱ्या दगडफेकीची घटना सुरूच आहेत. नगर जिल्ह्यात बसवर दगडफेक होण्याची आणखी एक घटना घडली. जामखेड अगाराच्या नगर-जामखेड या बसवर अज्ञात हल्लेखोरांनी दगडफेक केली. त्यामुळे परिवहन मंत्र्यांच्या आवाहनाला प्रतिसाद देत कामावर हजर झालेल्या कर्मचाऱ्यांमध्ये भीतीचे वातावरण आहे.
काही मागण्या मान्य झाल्याने, चर्चा सकारात्मक होत असल्याने काही कर्मचारी कामावर हजर होत आहे. जामखेड आगारातही अनेक कर्मचारी कामावर हजर झाले. त्यांच्यामार्फत बससेवा सुरू करण्यात येत आहे. कामावर हजर झालेले कर्मचारी नगरहून जामखेडला प्रवासी घेऊन निघाले होते. सोमवारी रात्री साडेनऊच्या सुमारास जामखेड अगाराची नगर-जामखेड बस (एम. एच ४० ए.क्यु. ६२२४) सुमारास नगरहून जामखेडकडे निघाली होती. बस आष्टीजवळ गांधनवाडी फाटा येथे आली असता दुचाकीवरून आलेल्या हल्लेखोरांनी बसवर दगडफेक केली. यामध्ये बसच्या काचा फुटल्या. सुदैवाने कोणीही जखमी झाले. दगडफेक करून हल्लेखोर पळून गेले. बसचालकाने बस आष्टी पोलिस ठाण्यात नेऊन तेथे फिर्याद दिली. पोलिसांनी गुन्हा दाखल करून तपास सुरू केला आहे.
संप सुरू होऊन दोन महिन्यांहून अधिक काळ झाला आहे. मधल्या काळात झालेली पगारवाढ, चर्चा, प्रस्ताव मान्य न झाल्याने कर्मचाऱ्यांनी संप सुरूच ठेवला. असे असेल तरी अनेक कर्मचारी कामावर हजर होत आहे. काही ठिकाणी सेवानिवृत्त आणि कंत्राटी कर्मचाऱ्यांना घेऊन एसटीने सेवा सुरू करण्याचा प्रयत्न केला आहे. अशा परिस्थितीत भीती निर्माण करून संप चिघळविण्याचे प्रकारही सुरू असल्याचे दगडफेकीच्या घटनांवरून दिसून येते. याचा परिणाम कामावर आलेल्या कर्मचाऱ्यांवर होत आहे.
ADVERTISEMENT 
जामखेड आगारातून सध्या आठ बस सुरू आहेत. आणखी कर्मचारी कामावर येण्यास इच्छुक असल्याचे सांगण्यात येते. मात्र, दगडफेकीच्या घटनेमुळे दहशत निर्माण होत आहे. सोमवारी रात्रीच्या या घटनेचे पडसादही आज मंगळवारी पाहायला मिळाले. सकाळपासून जामखेडहून केवळ एक बस बाहेर पडली आहे. हल्लेखोरांचा बंदोबस्त करून एसटीला पोलीस संरक्षण देण्यात यावे अशी मागणी हजर झालेल्या कर्मचाऱ्यांकडून केली जात आहे.
