भुतवडा तलावातून जामखेडच्या पाणी टाकीत पूर्ण क्षमतेने पाणी! नगराध्यक्षा प्रांजल चिंतामणी, सभापती श्रीराम डोके यांचे प्रयत्न, पाच विद्युत पंपांद्वारे पाणीपुरवठा सुरळीत करण्यासाठी उपाययोजना
भुतवडा तलावातून जामखेडच्या पाणी टाकीत पूर्ण क्षमतेने पाणी!
नगराध्यक्षा प्रांजल चिंतामणी, सभापती श्रीराम डोके यांचे प्रयत्न, पाच विद्युत पंपांद्वारे पाणीपुरवठा सुरळीत करण्यासाठी उपाययोजना
जामखेड शहरात सध्या भीषण पाणीटंचाई निर्माण झाली असून, नागरिकांना पाण्यासाठी मोठ्या अडचणींचा सामना करावा लागत आहे. भुतवडा तलावातील पाणीसाठा कमी झाल्यामुळे शहराच्या पाणीपुरवठा योजनेच्या टाकीत अपेक्षित क्षमतेने पाणी पोहोचत नव्हते. ही अडचण दूर करण्यासाठी जामखेड नगरपरिषदेच्या नगराध्यक्षा प्रांजलताई चिंतामणी, पाणीपुरवठा सभापती श्रीराम डोके तसेच सर्व नगरसेवकांच्या प्रयत्नातून महत्त्वपूर्ण उपाययोजना करण्यात आली आहे.
भुतवडा तलावात पाच विद्युत पंप बसवून त्याद्वारे चारीत पाणी सोडण्याची व्यवस्था करण्यात आली आहे. या उपाययोजनेमुळे तलावातून शहराच्या पाणीपुरवठा योजनेच्या टाकीत आता पूर्ण क्षमतेने पाणी पोहोचत असल्याची माहिती देण्यात आली आहे. त्यामुळे पाणीपुरवठा व्यवस्थेला काही प्रमाणात दिलासा मिळण्याची अपेक्षा व्यक्त होत आहे.
दरम्यान, जामखेड शहरासह परिसरातील पाणीटंचाईचे संकट अद्याप गंभीर आहे. शहरात सध्या साधारण पंधरा दिवसांच्या अंतराने पाणीपुरवठा केला जात आहे. तर परिसरातील टंचाईग्रस्त भागांमध्ये टँकरद्वारे पाणीपुरवठा सुरू असून, सुमारे १५ टँकरच्या माध्यमातून दोन खेपा करून नागरिकांना पाणी उपलब्ध करून दिले जात आहे.
भुतवडा तलावातील कमी झालेला पाणीसाठा आणि वाढती पाण्याची मागणी लक्षात घेता नगरपरिषदेने केलेली पाच विद्युत पंपांची व्यवस्था सध्याच्या परिस्थितीत महत्त्वाची ठरत आहे. मात्र, शहरातील नागरिकांना पंधरा दिवसांच्या प्रतीक्षेनंतर पाणी मिळत असल्याने नियमित आणि पुरेसा पाणीपुरवठा कधी सुरू होणार, याकडे जामखेडकरांचे लक्ष लागले आहे.
पाच पंपांमुळे टाकीत पूर्ण क्षमतेने पाणी पोहोचू लागले असले, तरी जामखेडकरांची पंधरा दिवसांची पाण्याची प्रतीक्षा संपविण्याचे मोठे आव्हान नगरपरिषद प्रशासनासमोर कायम आहे.