जामखेड प्रतिनिधी
जामखेड न्युज – – -(सुदाम वराट)
वेळोवेळी सरकारसोबत वाटाघाटी करूनही सरकार एसटी तोट्यात असल्याचे कारण देत महागाई भत्ता,घरभाडे भत्ता, वेतवाढ देत नाही, त्यामुळे आता एसटी महामंडळाचे राज्यसशानात विलीनीकरणा शिवाय पर्याय नाही, येत्या 30 तारखेपर्यंत प्रलंबित मागण्या मान्य करून शासनात विलीनीकरण न झाल्यास राज्यातील सर्व एसटी कामगार संघटना ऐन दिवाळीच्या तोंडावर संपाच्या पावित्र्यात आहेत. एक नोव्हेंबर रोजी सदस्यांचे मतदान घेऊन याबाबत पुढील दिशा ठरवली जाणार असा इशारा महाराष्ट्र एसटी कामगार संघटनेच्या वतीने देण्यात आला आहे.
ऐन दिवाळीत एसटीची चाके थांबणार!!
-अहमदनगर जिल्ह्यातील शेवगाव इथे महाराष्ट्र एसटी कामगार संघटनेचा कामगार मेळाव्यात संघटनेचे अध्यक्ष संदीप शिंदे, जनरल सेक्रेटरी हनुमंत ताटे, जिल्हा सरचिटणीस दिलीप लबडे या पदाधिकाऱ्यांनी हा इशारा दिला आहे. संपाबाबत शासकीय नियमांची अमलबाजवणी साठी लोणावळा इथे बैठक घेण्यात येऊन संपाबाबत एक नोव्हेंबरला मतदान घेण्यात येणार आहे. मात्र आता शासनात विलीनीकरण आणि राज्य शासनाची मुद्रा मिळाल्याशिवाय आंदोलन थांबणार नाही असा आक्रमक पवित्रा मेळाव्याच्या निमित्ताने घेण्यात आला आहे. ऐन दिवाळीच्या तोंडावर एसटी कामगार संपावर जाण्याच्या तयारीत असल्याने राज्यसरकार पुढे हे संकट असून यातून मार्ग काढण्यासाठी परिवहन मंत्री अनिल परब, मुख्यमंत्री ठाकरे यांच्या निर्णयाकडे आता लक्ष असेल.
कोरोना काळात ३०६ मृत्यू, तर आर्थिक विवंचनेत २६ आत्महत्या-
-कोरोनाच्या संकट काळात परजिल्ह्यात विशेषतः मुंबई-ठाण्यात सेवा बजावताना ३०६ एसटी कर्मचाऱ्यांचा कोरोना मुळे मृत्यू झाला आहे, तसेच आर्थिक विवंचनेतुन २६ कर्मचाऱ्यांनी आता पर्यंत आत्महत्या केल्या आहेत. अशी बिकट परस्थिती असताना सरकार एसटी तोट्यात असल्याचे कारण देत मागण्या मान्य करून पूर्णत्वास नेत नाही, मात्र एसटी तोट्यात असण्याला कर्मचारी नव्हे तर शासनाचे धोरण कारणीभूत आहे असे यावेळी संघटनेच्या पदाधिकाऱ्यांनी स्पष्ट केले.
राज्य पदाधिकाऱ्यांची मेळाव्यास उपस्थिती-
-मेळाव्यास महाराष्ट्र एसटी कामगार संघटनेचे अध्यक्ष संदीप शिंदे, जनरल सेक्रेटरी हनुमंत ताटे,शेवंगाव पंचायत समितीचे सभापती क्षितिज घुले, जिल्हा सरचिटणीस दिलीप लबडे, यांच्यासह राज्य आणि जिल्ह्यातील संघटनेचे पदाधिकारी, संघटनेचे सदस्य मोठ्या संख्येने उपस्थित होते.
