जामखेड शहरात वाहतूक नियमांचे उल्लंघन करणाऱ्या वाहनचालकांनो, सावधान! जामखेड पोलिसांनी वाहतूक नियम मोडणाऱ्यांविरोधात कारवाईचा धडाका लावला आहे. पहिल्या दिवशी सुमारे ४० वाहनांवर कारवाई केल्यानंतर दुसऱ्या दिवशीही आणखी ४० वाहनांवर कारवाई करण्यात आली. दुसऱ्या दिवशीच्या कारवाईत तब्बल २१ हजार रुपयांचा दंड वसूल करण्यात आला.
पोलीस निरीक्षक दशरथ चौधरी यांच्या नेतृत्वाखाली सुरू असलेल्या या मोहिमेमुळे नियमभंग करणाऱ्या वाहनचालकांचे धाबे दणाणले आहेत. नंबरप्लेट नसणे, फॅन्सी नंबरप्लेट वापरणे, हेल्मेट न घालणे, वाहनांची आवश्यक कागदपत्रे नसणे, अल्पवयीन मुलांकडून वाहन चालवणे, ट्रिपल सीट प्रवास आणि कर्कश हॉर्नचा वापर अशा विविध प्रकारच्या नियमभंगांविरोधात पोलिसांनी कारवाई सुरू केली आहे. शहरातील वाहतूक व्यवस्था शिस्तबद्ध करणे आणि नागरिकांची सुरक्षितता सुनिश्चित करणे, हा या मोहिमेचा मुख्य उद्देश आहे.
काल ४०, आजही ४०; पोलिसांचा ॲक्शन मोड कायम! जामखेड पोलिसांनी सलग दुसऱ्या दिवशीही वाहतूक नियमभंग करणाऱ्या वाहनचालकांविरोधात कारवाई सुरू ठेवली. वाहनचालकांना रस्त्यावर अडवून त्यांच्या वाहनांची आणि आवश्यक कागदपत्रांची तपासणी करण्यात आली. नियमांचे उल्लंघन करणाऱ्या वाहनचालकांवर नियमानुसार दंडात्मक कारवाई करण्यात आली.
दोन दिवसांत सुमारे ८० वाहनांवर कारवाई झाल्याने शहरात या मोहिमेची जोरदार चर्चा सुरू आहे. वाहनांची तपासणी करण्यासाठी जामखेड पोलीस ठाण्याच्या परिसरात मोठी गर्दी झाल्याने काही काळ जणू जत्रेचे स्वरूप निर्माण झाले होते.
कागदपत्रे नसतील तर कारवाईला सामोरे जा! वाहन चालवताना आवश्यक कागदपत्रे जवळ बाळगणे बंधनकारक आहे. वाहन परवाना, वाहन नोंदणी प्रमाणपत्र, विमा आणि लागू असलेली इतर आवश्यक कागदपत्रे तपासली जात आहेत. नियमांचे उल्लंघन करणाऱ्यांविरोधात नियमानुसार कारवाई केली जाणार असून, ही मोहीम यापुढेही सुरू राहणार असल्याचा इशारा पोलीस निरीक्षक दशरथ चौधरी यांनी दिला आहे.
रात्री ११ वाजता सर्व आस्थापना बंद! वाहतूक नियमांच्या अंमलबजावणीबरोबरच शहरातील कायदा व सुव्यवस्था राखण्यासाठीही पोलिसांनी कडक भूमिका घेतली आहे. शहरातील सर्व आस्थापना रात्री ११ वाजता बंद करण्यात येतील, असे पोलीस निरीक्षक दशरथ चौधरी यांनी स्पष्ट केले.
शहरातील शांतता, सुरक्षितता आणि शिस्त राखण्यासाठी पोलिसांकडून नियमांची प्रभावी अंमलबजावणी केली जाणार आहे. त्यामुळे व्यापारी, व्यावसायिक आणि नागरिकांनी पोलिसांच्या सूचनांचे पालन करावे, असे आवाहन करण्यात येत आहे.
पोलीस पथकाची धडक मोहीम पोलीस निरीक्षक दशरथ चौधरी यांच्या मार्गदर्शनाखाली सहाय्यक पोलीस निरीक्षक अजित मोरे, हेड कॉन्स्टेबल प्रवीण इंगळे, बाळू पाखरे, तुकाराम सोनवणे, दिनेश गंगे, सतीश चव्हाण, इम्रान शेख, ईश्वर परदेशी, ज्ञानेश्वर कोठुळे, गणेश ढोबळे यांच्यासह इतर पोलीस कर्मचारी या मोहिमेत सहभागी झाले.
नियम पाळा, अन्यथा दंडाला सामोरे जा! जामखेड पोलिसांच्या या धडक मोहिमेमुळे वाहतूक नियमांचे पालन करण्याचा संदेश वाहनचालकांपर्यंत पोहोचला आहे. हेल्मेटचा वापर करणे, वाहनांची कागदपत्रे जवळ ठेवणे, नियमबाह्य नंबरप्लेट टाळणे आणि अल्पवयीन मुलांना वाहन चालविण्यास न देणे, ही प्रत्येकाची जबाबदारी आहे. दोन दिवसांत ८० वाहनांवर कारवाई आणि दुसऱ्या दिवशी २१ हजारांचा दंड! जामखेड पोलिसांनी सुरू केलेल्या या मोहिमेमुळे वाहतूक नियमांचे उल्लंघन करणाऱ्यांना चांगलाच इशारा मिळाला असून, ही कारवाई यापुढेही सुरू राहणार असल्याने वाहनचालकांनी नियमांचे पालन करावे.
