जामखेडच्या नटराज कलाकेंद्रात महाराष्ट्राचा सांस्कृतिक वारसा दिमाखात जागला!
जामखेड येथील नटराज सांस्कृतिक कला केंद्रामध्ये पारंपरिक कला, पारंपरिक वाद्ये, पारंपरिक साज आणि मनोरंजनाचा बहारदार सांस्कृतिक सोहळा उत्साहपूर्ण वातावरणात दिमाखात पार पडला. आधुनिकता आणि डिजिटल युगाच्या वाढत्या प्रभावाच्या काळात आपल्या मातीशी, परंपरेशी आणि लोककलेशी असलेले नाते अधिक घट्ट करणारा हा कार्यक्रम ठरला. महाराष्ट्राच्या समृद्ध सांस्कृतिक वारशाचे दर्शन घडविणाऱ्या या सोहळ्याला रसिकांचा उत्स्फूर्त प्रतिसाद लाभला.
कार्यक्रमाचा शुभारंभ वंचित बहुजन आघाडीचे नेते ॲड. अरुण (आबा) जाधव, ॲड. हर्षल डोके व गौरव झांझुर्णे यांच्या हस्ते दीपप्रज्वलनाने करण्यात आला. दीपप्रज्वलनानंतर तुतारीचा निनाद, ढोलकीची दमदार थाप आणि घुंगरांचा छनछनाट यामुळे नटराज कलाकेंद्राचे वातावरण भारावून गेले. कलाकारांच्या सादरीकरणाला रसिकांनी टाळ्यांचा कडकडाट आणि उत्स्फूर्त दाद देत कार्यक्रमाचा आनंद द्विगुणित केला.
या सांस्कृतिक सोहळ्यात ‘किरण हानदगावकर संगीतबारी पार्टी’च्या कलाकारांनी आपल्या कलागुणांचे प्रभावी सादरीकरण केले. किरण जाधव, ईश्वरी जाधव, निलम जाधव, रेश्मा जाधव, जागृती चव्हाण, अश्विनी गायकवाड, रतन भोसले, अनिता काळे, श्रद्धा भोसले आणि श्रृती भोसले या कलाकारांनी विविध पारंपरिक कलाप्रकार सादर करून उपस्थितांची मने जिंकली.
कलाकारांच्या सादरीकरणामध्ये लोककलेचा अस्सल बाज, लय, ताल आणि भावनांचा सुंदर मिलाफ पाहायला मिळाला. पायातील घुंगरांचा लयबद्ध नाद, ढोलकीची थाप, पारंपरिक वेशभूषा आणि कलाकारांच्या प्रभावी अदाकारीने संपूर्ण वातावरण भारून गेले. प्रत्येक सादरीकरणानंतर रसिकांकडून मिळणाऱ्या उत्स्फूर्त टाळ्यांनी कलाकारांचा उत्साह वाढत होता.
महाराष्ट्राची लोककला ही केवळ मनोरंजनाचे साधन नसून ती आपल्या सामाजिक आणि सांस्कृतिक जीवनाचा अविभाज्य भाग आहे. अनेक पिढ्यांपासून जपली गेलेली ही परंपरा आजही कलाकारांच्या मेहनतीतून आणि निष्ठेतून जिवंत आहे. बदलत्या काळात पारंपरिक कलांना व्यासपीठ उपलब्ध करून देणे आणि नव्या पिढीला या कलापरंपरेशी जोडणे, ही काळाची गरज असल्याचे या कार्यक्रमातून अधोरेखित झाले.
नटराज सांस्कृतिक कला केंद्रात झालेला हा सोहळा केवळ मनोरंजनाचा कार्यक्रम न ठरता अस्सल मराठी संस्कृती, लोकपरंपरा आणि महाराष्ट्राच्या समृद्ध सांस्कृतिक वारशाला वाहिलेली भावपूर्ण मानवंदना ठरला. कलाकारांच्या दमदार सादरीकरणाने आणि रसिकांच्या भरभरून प्रतिसादाने कार्यक्रमाला विशेष रंगत आली. टाळ्यांच्या कडकडाटात या अविस्मरणीय सांस्कृतिक सोहळ्याची सांगता झाली.
