सामाजिक कार्यकर्ते संजय कोठारी यांच्यामुळे वाचले एकाचे प्राण “वेळेवर रुग्णवाहिका, दरवाजा तोडून काढले बाहेर; आत्महत्येचा प्रयत्न फसला”

जामखेड न्युज – – – – – 

सामाजिक कार्यकर्ते संजय कोठारी यांच्यामुळे वाचले एकाचे प्राण

“वेळेवर रुग्णवाहिका, दरवाजा तोडून काढले बाहेर; आत्महत्येचा प्रयत्न फसला”

सामाजिक बांधिलकीचा प्रत्यय देणारी घटना शुक्रवारी सायंकाळी घडली. सामाजिक कार्यकर्ते संजय कोठारी यांच्या प्रसंगावधानामुळे एका तरुणाचे प्राण वाचले.

घडली घटना अशी
शुक्रवार दि. १९ जुलै २०२६ रोजी सायंकाळी कोठारी यांना फोन आला – “संजू काका, लवकर या! एका मुलाने औषध घेतले आहे. तो बेशुद्ध अवस्थेत पडला असून तोंडाला फेस आला आहे.”

क्षणाचाही विलंब न करता संजू काका स्वतःची रुग्णवाहिका घेऊन सहकारी ऋषिकेश शेळके यासोबत घटनास्थळी दाखल झाले. परिस्थिती भयंकर होती. ज्या खोलीत तरुणाने विषारी औषध घेतले होते, त्या खोलीला आतून कडी लावलेली होती.

खिडकीतून एका कर्मचाऱ्याने आत पाहिले असता तरुण निपचित पडलेला दिसला. त्याने तातडीने मालकाला कळवले. मालकाने थेट संजय कोठारी यांनाच फोन करून मदत मागितली

दरवाजा तोडला, प्राण वाचवले
कोठारी यांनी घटनास्थळी पोहोचताच क्षणाचाही विचार न करता रूमचा कडी-कोंडा तोडला. आतमध्ये तरुण बेशुद्ध अवस्थेत पडला होता. त्याच्या खिशातील आधार कार्डवरून त्याचे नाव अविनाश उमाजी यादव, वय अंदाजे २५, रा. बोर्डेवाडी, ता. शिरूर, जि. बीड असे समजले.

कोठारी यांनी स्वतः चार जणांच्या मदतीने अविनाशला उचलून रुग्णवाहिकेत टाकले व तातडीने ग्रामीण रुग्णालय, जामखेड येथे दाखल केले. डॉक्टरांनी तातडीने उपचार सुरू केल्याने त्याचे प्राण वाचले.

पोलिसांना माहिती
सदरची घटना सामाजिक कार्यकर्ते संजय कोठारी यांनी जामखेड पोलीस स्टेशनचे पोलीस निरीक्षक दशरथ चौधरी यांना फोनवरून कळवली. पोलिसांनी घटनेची नोंद घेऊन पुढील तपास सुरू केला आहे.

प्रकृतीत सुधारणा, आईने मानले आभार सुरुवातीला तब्येत अतिशय गंभीर होती. आज त्यास भेटायला गेलो असता तब्येत बऱ्यापैकी सुधारलेली दिसून आली.

अविनाशच्या आईने डोळ्यात पाणी आणत सामाजिक कार्यकर्ते संजय कोठारी यांचे हात जोडून आभार मानले. “माझा पोरगा आज तुमच्यामुळेच जिवंत आहे. संजूभाऊ देवासारखे धावून आले,” असे म्हणत त्यांनी कृतज्ञता व्यक्त केली.

संजय कोठारी म्हणाले
“प्रत्येक जीव महत्त्वाचा आहे. संकटात असलेल्या व्यक्तीला मदत करणे हे माझे कर्तव्य समजतो. समाजानेही अशा प्रसंगी पुढे आले पाहिजे. आत्महत्या हा पर्याय नाही, बोला-संवाद साधा.”