जामखेड न्युज – – – – –
ICU मध्ये असूनही सहकाऱ्याच्या मस्टरची काळजी करणारे ग्रामरोजगार सेवक अशोक थोरात ”
“जामखेड पंचायत समिती समोर मोटारसायकलच्या अपघातानंतरही कर्तव्याप्रती निष्ठा कायम”
कामाच्या बाबतीत किती प्रामाणिक असावे याचे ज्वलंत उदाहरण म्हणजे अशोक थोरात. ICU मध्ये उपचार सुरू असताना, वेदना सहन करत असतानाही साहेबांनी ऑपरेटर महेश पेचे यांना निरोप दिला “माझे मस्टर ऑनलाइन पेमेंट व्हावे, बघा जरा.”हे ऐकून मन अक्षरशः गहिवरून आले.
१८ वर्षांची निस्वार्थ सेवा
आयुष्यातील तब्बल १८ वर्षे ज्यांनी ग्रामविकासाची जबाबदारी खांद्यावर घेतली, प्रत्येक कुटुंबातील सर्वसामान्य माणसाला न्याय दिला, त्यांच्यावर असा प्रसंग ओढवला. तरीही विचार मात्र कर्तव्याचाच!
अपघात आणि तातडीची मदत
पंचायत समितीसमोरच दुर्दैवी घटना घडली. भरधाव मोटारसायकलने थोरात साहेबांना जोराची धडक दिली. शासन उद्या काय विचार करेल हे माहीत नाही, पण त्याच क्षणी आमचे सहकारी रोजगार सहायक मोहन पवार यांनी क्षणाचाही विलंब न करता इतरांच्या मदतीने रिक्षा करून साहेबांना तातडीने हॉस्पिटलमध्ये अॅडमिट केले व मला फोन केला. निरोप मिळताच मीही तत्काळ हॉस्पिटलला हजर झालो.
कुटुंब व प्रशासनाची धावपळ
पुढील उपचारासाठी साहेबांचे चिरंजीव तातडीने आले. डॉक्टरांच्या सल्ल्यानुसार CT Scan करण्यासाठी दुसऱ्या डायग्नोस्टिक सेंटरला नेऊन सर्व आवश्यक रिपोर्ट्स काढण्यात आले. प्रकृती चिंताजनक असूनही साहेबांची पहिली काळजी “मस्टरचे पेमेंट वेळेत झाले पाहिजे, मजुरांना त्रास नको.”
पोलीस कारवाईसाठी पाठपुरावा
मी स्वतः पोलीस स्टेशनला जाऊन घटनेची सविस्तर कल्पना दिली. संबंधित दुचाकी चालकावर गुन्हा दाखल करावा, घटनास्थळाची पंचनामा करून पाहणी करावी, अशी लेखी विनंती करून जबाब नोंदवला.
