जामखेड न्युज – – –
मराठा आरक्षणाची लढाई आपण संयमाने लढत आहोत. ठरवलं तर या प्रश्नावर दोन मिनिटांत महाराष्ट्र पेटून उठू शकतो; पण आपल्याला ते करायचे नाही. मराठा आरक्षणाच्या लढ्यात ताकदीसोबतच जो संयम आणि शिस्त आपण दाखवली आहे ती आपल्याला यापुढेही पाळावी लागेल, असे मत खासदार संभाजीराजे यांनी व्यक्त केले._
मराठा समाजाला न्याय मिळवून देऊ
मराठा समाजाला न्याय मिळवून देणारत, असा विश्वास त्यांनी व्यक्त केला. पुढचे मूक आंदोलन नांदेडला करण्यात येईल असे जाहीर करतानाच याप्रश्नावर समाज सांगेल तितके दिवस आपण उपोषणाला बसायला तयार असल्याचेही या वेळी संभाजीराजे यांनी नमूद केले.
आरक्षण मिळेपर्यंत लढा सुरू राहणार
मराठा समाजाने सरकारकडे केलेल्या मागण्यांचा जिल्ह्यातील समन्वयकांकडून विषयवार आढावा घेतला जात आहे. या बैठकीत संभाजीराजे यांनी मार्गदर्शन केले व आक्रमक भूमिका मांडली. मराठा आरक्षणाचा लढा आरक्षण मिळेपर्यंत सुरूच राहणार असून पुढचे आंदोलन मंत्रिमंडळाच्या मराठा आरक्षण विषयक उपसमितीचे अध्यक्ष अशोक चव्हाण यांच्या नांदेडात करण्याची घोषणा संभाजीराजे यांनी या वेळी केली. याआधी कोल्हापुरातून या आंदोलनाला सुरुवात झाली असून नाशिकमध्येही आंदोलन करण्यात आले आहे. सरकारच्या आश्वासनानंतर हे आंदोलन स्थगित करण्यात आले होते.
टिकणारे आरक्षण द्या
राज्यातील कोविड स्थिती आणि काही दिवसांपूर्वीची पूरस्थिती पाहता आम्ही शांत राहिलो. परिस्थितीचे भान आम्ही राखले; पण आमच्या प्रश्नांचे काय, याचे उत्तर सरकारला द्यावेच लागणार आहे. जो वंचित आहे, त्याला आरक्षण मिळालेच पाहिजे ही माझी स्पष्ट भूमिका असून मराठा समाजाला टिकणारे आरक्षण कसे द्यायचे हे सरकारने ठरवायला हवे. ती सरकारचीच जबाबदारी आहे. त्यासाठी डोक लावा, असा सल्ला संभाजीराजे यांनी दिला.
मी मॅनेज होणारा नाही
मी मॅनेज होणारा नेता नाही, असे सांगताना माझ्यावर विश्वास ठेवा. आंदोलन करायचे की काय करायचे हे तुम्ही सगळ्यांनी ठरवा. तुम्ही जे म्हणाल ते करायला मी तयार आहे. तुम्ही सांगितले, तर मी उपोषणाला बसायलाही तयार आहे. तुम्ही सांगाल तितके दिवस मी उपोषणाला बसेन, असेही संभाजीराजे यांनी या वेळी सांगितले.
