जामखेड न्युज——
सभापती व आमदार यांनी शिफारस करूनही जामखेड आगाराच्या नशिबी पुन्हा पाच जुन्याच बस
एकेकाळी नाशिक विभागात अधिक उत्पन्न मिळवून देणारे जामखेड आगार सध्या समस्यांच्या विळख्यात सापडले आहे. जुन्या बस, दररोज कुठे ना कुठे रस्त्यात बंद पडलेल्या बस धक्का टार्ट बस, खिळखिळ्या झालेल्या बस यामुळे जामखेड आगाराची अवस्था दैनीय झाली आहे. विधानपरिषदेचे सभापती प्रा. राम शिंदे व आमदार रोहित पवार यांनी लक्ष घालून जामखेड आगारासाठी नवीन बस मिळण्यासाठी प्रयत्न करणे आवश्यक आहे.
जामखेड आगारात अगोदरच नऊ वर्षांच्या जुन्या बस आणि आता तारकपूर आगारातून पाच जुन्या बस घेऊन जाण्याबाबत विभागनियंत्रकांने आदेश काढले आहेत. वर्षभरापूर्वी श्रीगोंदे डेपोतून पाच नवीन बस मिळणार होत्या परंतु तेथील नागरिकांनी आंदोलन केले आणि बस मिळाल्या नाहीत. जामखेड आगाराला नवीन बस मिळावे म्हणून आ. रोहीत पवार यांनी विधानसभेत प्रश्न उपस्थित केला होता तर सहा महिन्यापूर्वी आमदार प्रा. राम शिंदे यांनी जामखेड आगाराला नवीन बस मिळाव्यात म्हणून नाशिक विभाग नियंत्रक यांना मागणी केली होती दोन्ही आमदारांचा राज्याच्या राजकारणात प्रभाव असताना परिवहन महामंडळाकडून मात्र दुर्लक्ष केले जात आहे. जिल्हा विभाग नियंत्रकाकडून मिळणाऱ्या दुजाभावचा तालुका प्रवासी संघटना व ग्रामीण प्रवासी संघटनेने निषेध केला आहे.
जामखेड आगार पाच जिल्ह्य़ाच्या सिमेवर असल्याने सदर आगार व बसस्थानक चोवीस तास चालू असते. मागील २०, २५ वर्षापूर्वी जामखेड आगार नाशिक विभागात प्रथम क्रमांकावर होता व जिल्ह्यात नव्हे तर नाशिक विभागात दबदबा होता. सध्या जामखेड आगारात ५० बस असून त्या नऊ वर्षे जुन्या आहेत. दोन शिवशाही व दोन स्लिपरकोच आहे. जुन्या बस असल्याने त्या कोठेही बंद पडतात यामुळे या बसमधून प्रवास करण्यास प्रवासी धजावत नाही. परिणामी आगाराच्या उत्पन्नावर त्याचा परिणाम झाला आहे. प्रवासी भाडय़ात १५ टक्के दरवाढ झाली त्याप्रमाणे सुविधा मिळत नाही. व वर्षोनुवर्षे वापरलेल्या जुना बसमुळे प्रवासी हैराण झाले आहेत.
जामखेड आगाराला नवीन बस मिळाव्यात म्हणून तालुका प्रवासी संघटनेने वारंवार जिल्हा विभाग नियंत्रकाकडे मागणी केली होती. याबाबत आ. रोहीत पवार व आ. प्रा. राम शिंदे यांना यापूर्वी पत्र देऊन मागणी केली होती. आ. रोहीत पवार यांनी विधानसभेत जामखेड आगाराची परिस्थिती व बसची परिस्थिती नमूद करून नवीन बस मिळावे अशी मागणी केली होती. तसेच आ. राम शिंदे यांनी जिल्हा विभाग नियंत्रक, नाशिक विभाग नियंत्रक यांना मोबाईलवरून संवाद साधून नवीन बस आल्या की जामखेड आगाराला प्राधान्य देण्या बाबत सुचवले होते. मागील वर्षी श्रीगोंदे आगारातून पाच बस मिळणार होत्या पण तेथील नागरिकांनी आंदोलन केले व पाच जुन्या बस मिळाल्या.
जिल्हा विभाग नियंत्रक राजेंद्र जगताप यांनी जामखेड व शेवगाव आगाराला पाच बस तारकपूर आगारातून घेऊन जावे व अकोले करीता दोन बस संगमनेर येथून घेऊन जाण्यासाठी दि. १२ फेब्रुवारी रोजी पत्र पाठवले आहेत. सदर बस नवीन मिळतील अशी आशा होती परंतु याबाबत जिल्हा विभाग नियंत्रक राजेंद्र जगताप यांच्या बरोबर संपर्क साधला असता त्यांनी एक वर्ष वापरलेल्या बस देणार असल्याचे सांगितले.
