जामखेड न्युज——
मी कशाला मस्का लावू, फोन केल्याचा पुरावा द्या आमदार रोहित पवार
तुमच्याच प्रचाराला सावंतांना बोलवा
जामखेड कर्जत मतदारसंघाचे राष्ट्रवादीचे आमदार रोहित पवार आणि नुकतेच विधान परिषदेवर निवडून गेलेले भाजपचे आमदार राम शिंदे यांच्यामध्ये चांगलीच जुगलबंदी सुरू असून दिवाळी निमित्ताने आमदार राम शिंदे यांनी चौंडी येथे दिवाळी फराळाचा कार्यक्रम ठेवला होता. या ठिकाणी राज्याचे आरोग्य मंत्री तानाजी सावंत यांची प्रमुख उपस्थिती होती. यावेळी बोलताना आमदार राम शिंदे यांनी राष्ट्रवादीचे आमदार रोहित पवार यांच्यावर चांगलीच जहरी टीका केली होती.तानाजी सावंत यांनी जामखेड कर्जत मतदारसंघात येऊ नये यासाठी आमदार रोहित पवार यांनी तानाजी सावंत यांना दहा फोन करून जाऊ नका असे सांगितले होते असा आरोप आमदार राम शिंदे यांनी केला होता.
तर सातत्याने मागच्या दाराने आमदारकी मिळवली म्हणून आमदार रोहित पवार हे टीका करत असतात त्याला प्रत्युत्तर म्हणून आमदार राम शिंदे यांनी शरद पवार हे राज्यसभेवर मागच्या दाराने जातात मग आता तुम्ही त्यांनाही लक्ष करणार का अशी टीका केली होती. यावर आता रोहित पवार यांनी ट्विट करून उत्तर दिले असून या ट्विटद्वारे आमदार रोहित पवार यांनी आरोग्यमंत्री तानाजी सावंत आणि आमदार राम शिंदे यांच्यावर चांगलीच बोचरी टीका केली आहे.
येत्या निवडणुकीत २०२४ ला हातात झाडू घेऊन हा मतदारसंघ आपल्याला साफ करायचा आहे. एका ठिकाणी जनशक्ती आहे तर एका ठिकाणी धनशक्ती आहे. त्यांना वाटतं धनशक्तीच्या जोरावर पूर्ण महाराष्ट्र विकत घेऊ आणि अमेरिकेला जाऊ, अशी टीका आरोग्यमंत्री तानाजी सावंत यांनी रोहित पवार यांचे नाव न घेता केली होती. तसेच आरोग्यमंत्री तानाजी सावंत यांनी आपल्या मतदारसंघात येऊ नये, यासाठी रोहित पवार यांनी त्यांना दहा फोन केले होते, अशी आरोप भाजप आमदार प्रा. राम शिंदे यांनी केला होता. आता प्राध्यापक शिंदे आणि आरोग्यमंत्री तानाजी सावंत यांच्या आरोपाला राष्ट्रवादी काँग्रेसचे आमदार रोहित पवार यांनी जोरदार प्रत्युत्तर देत समाचार घेतला आहे.
ज्याला पैसा आणि अहंकाराची खाज आहे. ज्याला हाफकीन संस्था आहे की व्यक्ती? हे माहिती नाही, जो महाराष्ट्राला भिकारी बनविण्याची भाषा करतो, अशा व्यक्तीला मतदारसंघात न येण्यासाठी मी कशाला मस्का लावू? राम शिंदे पुड्या सोडू नका. खेकड्याची चाल लोक स्वीकारत नाहीत. हिंमत असेल तर याचा पुरावा द्या. आणि यापुढे तुमच्याच प्रचाराला त्यांना जरूर बोलवा… मग मैदानात बघू, असे आव्हान रोहित पवार यांनी थेट प्रा. शिंदे यांना दिले आहे.
गेल्या काही काळापासून या दोन नेत्यांमधील संघर्ष पेटला आहे. दोघांकडूनही एकमेकांना आव्हान दिले जात असून बोचरी टीकाही सुरू आहे. अलिकडेच शिंदे यांनी त्यांच्या चौंडी गावी दिवाळी फराळ कार्यक्रमाचे आयोजन केले होते. त्यावेळी भाजपसह अन्य काही पक्षांच्या नेत्यांनी हजेरी लावली होती. यामध्ये आरोग्यमंत्री तानाजी सांवतही उपस्थित होते. यावेळी प्रा. शिंदे यांनी प्रसार माध्यमांशी बोलताना आमदार रोहित पवार यांच्यावर निशाणा साधला होता.
मागच्या दाराने आलेले आमदार, असा उल्लेख रोहित पवार यांनी प्रा. शिंदेंचा केला होता. त्यावरून शिंदे यांनी प्रत्युत्तर देताना थेट राष्ट्रवादीचे अध्यक्ष शरद पवार यांचाच राज्यसभा निवडणुकीचा संदर्भ दिला. माझ्याबद्दल हे बोलतात मागच्या दाराने, तर त्यांना शरद पवार यांच्याबद्दलही तेच म्हणायचे आहे का? शरद पवार हे त्यांचे सख्खे आजोबा नाहीत. त्यामुळे असे बोलत असतील, असा टोलाही शिंदे यांनी लगावला होता. यावेळी बोलताना शिंदे यांनी रोहित पवार यांच्यावर आरोप करून मंत्री सावंत यांनी कार्यक्रमाला येऊ नये, यासाठी त्यांना फोन केला होता, असा आरोपही केला. त्याला आता रोहित पवार यांनी प्रत्युत्तर देत प्रा. राम शिंदे आणि आरोग्यमंत्री तानाजी सावंत यांच्यावरही टीका केली आहे.
