जामखेड प्रतिनिधी
जामखेड न्युज – – – (सुदाम वराट)
जामखेड येथील मराठी साहित्य प्रतिष्ठानचे सन २०१९ चे राज्यस्तरीय ग्रंथ पुरस्कार जाहीर करण्यात आल्याची माहिती संस्थेचे अध्यक्ष प्रसिद्ध लेखक प्रा. आ. य. पवार यांनी दिली.
काव्यसंग्रह, कथा, कादंबरी, लेखसंग्रहाचे ग्रंथपुरस्कार राजे संभाजी साहित्य पुरस्कार’ आणि समीक्षा
व बालसाहित्याचे ‘महात्मा फुले साहित्य पुरस्कार’ या नावाने पुरस्कार दिले जात असून, रोख रक्कम,
मानचिन्ह, गौरवपत्र, शाल व श्रीफळ असे पुरस्काराचे स्वरूप असून, पुढील महिन्यात होणाऱ्या राज्यस्तरीय
कविसंमेलनात पुरस्कारांचे वितरण होईल, अशी माहिती प्रतिष्ठानचे कार्याध्यक्ष प्रा. मधुकर राळेभात यांनी
दिली.
पुरस्कार याप्रमाणे – (कंसात ग्रंथाचे नाव) : राजे संभाजी साहित्य पुरस्कार : कादंबरी : (१) डॉ. सतीश
पाटील, कोल्हापूर (मृत्युस्पर्श) (२) प्रा. बाळासाहेब लबडे, रत्नागिरी (पिपिलिका मुक्तिधाम).
काव्यसंग्रह
: (१) प्रा. साईनाथ पाचारणे, पुणे (माझ्या वाट्याची लोकशाही) (२) विशाल इंगोले, बुलडाणा (माझ्या
हयातीचा दाखला). कथासंग्रह : प्रा. अनंता सूर, यवतमाळ (वाताहत). लेखसंग्रह : (१) अॅड. राम हरपाळे, औरंगाबाद (आनंदी जीवनाच्या वाटा) (२) रवींद्र जवादे, अकोले (गाई गेल्या राना).
महात्मा फुले साहित्य पुरस्कार : समीक्षा/संशोधन ग्रंथास – (१) डॉ. गणेश चव्हाण, नागपूर (अमृत
विचार मंथन) (२) डॉ. अरुण शिंदे, कोल्हापूर
(सत्यशोधकीय नियतकालिके).
बालसाहित्य : डॉ. मंजूषा कुलकर्णी, मुंबई (अणु विज्ञानातील झंझावात डॉ. अनिल काकोडकर).ग्रंथ निवड समितीत प्रा.डॉ. राजाराम सोनटक्के, डॉ. दत्तात्रय फलके, प्रा.डॉ. सुवर्णा गुंड, प्रा.डॉ. लक्ष्मीकांत येळवंडे यांनी काम पाहिले. अहमदनगर, बीड, उस्मानाबाद, सोलापूर जिल्ह्यात कायक्षेत्र असलेल्या मराठी साहित्य प्रतिष्ठान
जामखेड या संस्थेमार्फत कविसंमेलन, व्याख्याने, ग्रामीण साहित्य संमेलन, राज्यस्तरीय ग्रंथपुरस्कार व मराठी
भाषेसाठी विशेष कार्य केले जाते. ग्रंथ पुरस्काराचे हे चौथे वर्ष आहे.