लोणी शिव ते वाकी रस्त्याचा प्रश्न मार्गी लागण्याच्या दिशेने प्रकल्पग्रस्त वाकी गावच्या रस्त्याची PWD अधिकाऱ्यांकडून प्रत्यक्ष पाहणी

जामखेड न्युज – – – – – 

लोणी शिव ते वाकी रस्त्याचा प्रश्न मार्गी लागण्याच्या दिशेने

प्रकल्पग्रस्त वाकी गावच्या रस्त्याची PWD अधिकाऱ्यांकडून प्रत्यक्ष पाहणी

जामखेड तालुक्यातील प्रकल्पग्रस्त वाकी गावाचा अनेक दिवसांपासून प्रलंबित असलेला लोणी शिव ते वाकी रस्त्याचा प्रश्न अखेर मार्गी लागण्याच्या दिशेने आहे.

ग्रामपंचायत वाकी मार्फत दिनांक 1 जुलै 2026 रोजी सार्वजनिक बांधकाम विभाग जामखेड यांच्याकडे तक्रार अर्ज देण्यात आला होता. त्याचा सातत्याने पाठपुरावा केल्यानंतर सार्वजनिक बांधकाम विभागाचे अधिकारी आवटी साहेब यांनी दिनांक 24 जुलै 2026 रोजी वाकी गावात येऊन रस्त्याची प्रत्यक्ष पाहणी केली.

ग्रामस्थांसोबत बैठक व पाहणी
हनुमान मंदिरासमोर ग्रामस्थांची बैठक झाली. बैठकीच्या प्रारंभी सरपंच गणेश वायकर यांच्या हस्ते अधिकाऱ्यांचा सत्कार करण्यात आला. बैठकीत ग्रामस्थांनी रस्त्यावरील अतिक्रमण, अपघाती वळणे, वाहतुकीच्या अडचणी आणि दोन कोटी खर्च करूनही वाहून गेलेला नवीन रस्ता याबाबत आपली व्यथा मांडली.

त्यानंतर अधिकाऱ्यांनी सरपंच व ग्रामस्थांसमवेत संपूर्ण रस्त्याची पाहणी केली. पाहणीत अनेक ठिकाणी रस्त्यावर शेती नांगरणे, पाईपलाईन टाकणे आणि धोकादायक वळणे आढळून आली.

अधिकाऱ्यांनी दिले आश्वासन
पाहणीदरम्यान सर्व ठिकाणांचे छायाचित्रीकरण करण्यात आले. आवटी साहेब म्हणाले, “सर्व बाबी वरिष्ठांच्या निदर्शनास आणून देऊ. तातडीची कामे लवकरात लवकर हाती घेऊ. ठेकेदाराला वाहून गेलेला रस्ता दुरुस्त करण्याचे आदेश देऊ. धोकादायक ठिकाणी साइन बोर्ड लावू.”

यावेळी ग्रामस्थांनी तातडीने काम न झाल्यास आंदोलनाचा इशारा दिला.

पाठपुराव्यात सहभाग
या पाठपुराव्यासाठी सहाय्यक पोलीस उपाधीक्षक संजय लोहकरे, दिलीप धावडे, काकासाहेब शेळके, तुळशीराम उदमले, सरपंच गणेश वायकर यांच्यासह गावातील ज्येष्ठ नागरिकांनी पुढाकार घेतला.

बैठकीला सुरेश कुलकर्णी, जयवंता सावंत, दत्तात्रय सावंत, माजी सरपंच बाळू खाडे यांच्यासह मोठ्या संख्येने ग्रामस्थ उपस्थित होते. बैठक शांततेत आणि सकारात्मक वातावरणात पार पडली.

प्रकल्पग्रस्त वाकी गावचा हा प्रश्न आता सुटण्याची आशा असल्याने ग्रामस्थांमध्ये समाधानाचे वातावरण आहे.