जामखेड न्युज——
विधान परिषदेच्या शिक्षक, पदवीधर मतदारसंघाच्या निवडणुका लांबणीवर
महाराष्ट्रात सध्या लोकसभा निवडणुकीची रणधुमाळी सुरु आहे. या निवडणुकीदरम्यान निवडणूक आयोगाकडून विधान परिषदेच्या 2 शिक्षक आणि 2 पदवीधर मतदारसंघांसाठी निवडणूक जाहीर करण्यात आली होती. या निवडणुकीसाठी पुढच्या महिन्यात 10 जूनला मतदान होणार होतं. पण ही निवडणूक पुढे ढकलण्यात यावी, अशी मागणी शिक्षक संघटनांकडून केली जात होती.
10 जूनला अनेक शाळा आणि शिक्षकांना सुट्टी आहे. त्यामुळे मतदानावर त्याचा परिणाम पडू शकतो, असा शिक्षक संघटनांचा दावा होता. त्यामुळे ही निवडणूक पुढे ढकलण्याची मागणी होती. निवडणूक आयोगाने शिक्षक संघटनांची ही मागणी मान्य केली आहे. विधान परिषदेच्या दोन शिक्षक आणि दोन पदवीधर मतदारसंघाच्या निवडणुका अनिश्चित काळासाठी पुढे ढकलल्या आहेत.
विधान परिषदेच्या मुंबई पदवीधर मतदारसंघ आणि कोकण विभाग पदवीधर मतदारसंघ या दोन जागांसाठी निवडणूक जाहीर झाली होती. तसेच नाशिक आणि मुंबईच्या शिक्षक मतदारसंघांसाठी निवडणूक जाहीर झाली होती. या चारही जागांवरील विद्यमान आमदारांचा कार्यकाळ हा येत्या 7 जुलैला संपुष्टात येणार आहे. त्यामुळे निवडणूक आयोगाकडून या दोन पदवीधर आणि दोन शिक्षक मतदारसंघाची निवडणूक जाहीर झाली होती.
मतदान नेमकं कधी होणार?
मुबंई पदवीधर मतदारसंघावर सध्या विलास पोतनीस हे विद्यमान आमदार आहेत. कोकण विभाग पदवीधर मतदारसंघावर निरंजन डावखरे हे विद्यमान आमदार आहेत. नाशिक विभाग शिक्षक मतदारसंघावर किशोरे दराडे हे विद्यमान आमदार आहेत. तर मुंबई शिक्षक मतदारसंघात कपिल पाटील हे विद्यमान आमदार आहेत. या सर्व आमदारांचा विधान परिषदेचा कार्यकाळ हा येत्या 7 जुलै 2024 ला संपणार आहे. त्यामुळे निवडणूक आयोगाकडून या चार जागांसाठी निवडणूक घोषित करण्यात आली. विद्यमान आमदारांचा कार्यकाळ हा 7 जुलैला संपणार असल्याने त्याआधीच या चार जागांसाठी मतदान होण्याची शक्यता आहे.
दरम्यान, भाजपचे शिक्षक नेते आणि प्रदेश कार्यकारिणी सदस्य यांनी देखील निवडणूक जाहीर झाल्यानंतर प्रतिक्रिया दिली होती. “शाळा १५ जून रोजी सुरू होत असल्याने अनेक शिक्षक गावी जाणार आहेत त्यामुळे शिक्षक व पदवीधर मतदार संघाच्या निवडणुकीच्या मतदानावर परिणाम होणार असल्याने निवडणूक आयोगाने निवडणूक पुढे ढकलावी अशी मागणी निवडणूक आयोगाकडे केली आहे”, अशी प्रतिक्रिया अनिल बोरनारे यांनी दिली होती.
