जामखेड प्रतिनिधी
जामखेड न्युज – – (सुदाम वराट)
खाजगी सावकारकीचा बिमोड करण्यासाठी जामखेड पोलीस स्टेशनने कडक मोहिम सुरू केली असून जर कोणी खाजगी सावकार पैशासाठी त्रास देत असेल तर नागरिकांनी न घाबरता पोलीस स्टेशनला तक्रार दाखल करण्याचे आवाहन पोलीस निरीक्षक संभाजी गायकवाड यांनी केले आहे जनजागृती करण्यासाठी शहरात रिक्षा फिरवून व सोशल मिडीयावरून नागरिकांना आवाहन केले आहे.
जामखेड तालुक्यातील सर्व ग्रामस्थांना सुचित करण्यात येते की, कोणीही अवैध सावकारकी करू नये. कोणत्याही ग्रामस्थांना सावकाराकडुन वसुलीसाठी त्रास, जसे वांरवार
फोन करणे, घरी येणे, शिवीगाळ करणे, वस्तु उचलुन नेणे अगर इतर कोणतेही प्रकार होत असेल तर तात्काळ पोलीस स्टेशनला संपर्क करावा. कोणताही तक्रारदार हा पोलीस स्टेशनला तक्रार द्यायला आल्यास त्याला
कोणत्याही प्रकारचा त्रास सावकाराकडुन होणार नाही याची पोलीस काळजी घेतील. कोणत्याही सावकाराविरूद्ध तक्रार असल्यास खालील नंबरवर त्वरीत संपर्क करावा. तुमच्या तक्रारीची तात्काळ दखल घेतली जाईल. असे आवाहन केले आहे. तसेच पोलीस निरीक्षक संभाजी गायकवाड यांनी आपला मोबाईल नंबर जनतेसाठी दिला असून कोणाची काही तक्रार असेल तर खालील नंबरवर मो.नं. 9422644090 फोन नंबर
02421-221033 वर संपर्क करावा असे आवाहन करण्यात आले आहे.
शहरासह तालुक्यात अनेक तरुण छोटे-मोठे व्यवसाय करत आहेत. या व्यवसायात आपली आर्थिक गरज भागविण्यासाठी अनेक वेळा बँक, पतसंस्था च्या कडे कर्ज घ्यावे लागते हे कर्ज अनेकांना उपलब्ध होते. मात्र अनेक जणांना कुठली पत नसल्याने सहज कर्ज उपलब्ध होत नाही, अशी परिस्थिती असल्याने आपली गरज पूर्ण करण्यासाठी कुणापुढे तरी हाथ पसरावे लागत असतात.
शहरासह तालुक्यात अशाच प्रकारे व्यवसायिक, कामगार, नोकरदार, शेतकरी, बेरोजगार तरुण यांपैकी अनेकांना आर्थिक गरज पडते. अशा वेळी त्यांच्या आर्थिक प्रश्न बँक, पतसंस्थामधून सुटत असली तरी सगळ्यांना कर्ज मिळतेच असे नाही. यापुढे जाऊन ऐनवेळी कुणी कर्ज देते असे ही नसल्याने तातडीने पैसे उपलब्ध होण्यासाठी अनेक वेळा खाजगी सावकारांच्या दारात जावे लागत असल्याने शहरासह तालुक्यात असे कर्ज देणारे अनेक जण आहेत.
यांच्याकडे कुठले परवाना नाही मात्र ऐनवेळी कुणाच्या तरी मध्यस्थीने पैसे दिले जात असले तरी एक महिन्याच्यासाठी शेकडा पंधरा ते वीस टक्के प्रमाणे हे सावकार पैसे देत आहेत. कर्जापेक्षा व्याज जास्त होत असल्याने अनेक तरुण या ओझ्याखाली दबले आहेत.
आठवड्याला वसुली करणारे बहाद्दर
याबाबत एका तरुणांनी सांगितले की या जामखेड
परिसरात अनेक असे बेकायदेशीर सावकार असून ते गरजवंताला अशा प्रकारे पैसे देतात; मात्र आठ दिवसाला 40 टक्क्यांप्रमाणे पैसे वसुली करतात. वेळप्रसंगी दहशत निर्माण करीत आहेत.
…तर पाच वर्षे शिक्षा
बेकायदेशीर सावकारकीच्या समूळ उच्चाटनासाठी महाराष्ट्र शासनाने बेकायदेशीर सावकारांना पायबंध घालण्यासाठी सावकारी नियमन अध्यादेश 2014 हा सुधारित कायदा संपूर्ण राज्यभर लागू केला आहे. या नव्या कायद्याच्या तरतुदीनुसार विनापरवाना सावकारी करणार्‍यास पाच वर्षांपर्यंत कैदेची शिक्षा किंवा 50 हजार रुपयांपर्यंतच्या दंडाच्या शिक्षेची तरतूद केली.
