जामखेड शहरातून जाणाऱ्या राष्ट्रीय महामार्गावरील रस्त्याचा प्रश्न लवकरात लवकर मार्गी लावण्यासाठी राष्ट्रीय महामार्ग विभागाच्या अधिकाऱ्यांनी महामार्गाची अधिकृत आरओडब्ल्यू (ROW – Right of Way) हद्द तातडीने निश्चित करावी, अशी मागणी राहुल उगले यांनी केली आहे. रस्त्याच्या हद्दीबाबत स्पष्टता निर्माण करून संबंधित प्रश्नाचा तातडीने निपटारा करावा आणि रखडलेल्या कामाला गती द्यावी, अशी भूमिका राहुल उगले यांनी मांडली तर अतिक्रमण हटविताना दुजाभाव का मोठ्या व्यापाऱ्यांना सवलत तर गोरगरिबांच्या टपऱ्यांवर बुलडोझर असे का आम्ही आमची दिवाळी रस्त्यावर साजरी करायची का असा संतप्त सवाल टपरीधारकांनी उपस्थित केला.
शहरातील रस्ते मोकळे राहावेत, वाहतुकीला अडथळे निर्माण होऊ नयेत आणि नागरिकांना सुरक्षितपणे ये-जा करता यावी, यासाठी अतिक्रमण हटवणे आवश्यक आहे. मात्र, ही कारवाई करताना सर्व संबंधितांना समान न्याय मिळणेही तितकेच महत्त्वाचे आहे. काही ठिकाणी कारवाई होत असेल आणि इतर ठिकाणची अतिक्रमणे कायम राहत असतील, तर नागरिकांच्या मनात प्रश्न निर्माण होणे स्वाभाविक आहे, अशी भूमिका गाळेधारकांकडून मांडली जात आहे.
जामखेड शहरातून जाणाऱ्या राष्ट्रीय महामार्गाच्या कामाचा प्रश्न गेल्या काही वर्षांपासून चर्चेत आहे. महामार्गालगतची अतिक्रमणे, रस्त्याची अधिकृत हद्द आणि मोजणीबाबत निर्माण झालेला संभ्रम यामुळे या प्रश्नाकडे पुन्हा एकदा लक्ष वेधले जात आहे. शहरातील वाहतूक कोंडी कमी होण्यासाठी आणि नागरिकांना सुरक्षित व सुरळीत प्रवास करता यावा, यासाठी महामार्गाचे काम मार्गी लागणे आवश्यक आहे.
आरओडब्ल्यू हद्द निश्चित झाल्यास संभ्रम दूर होण्यास मदत महामार्गाची आरओडब्ल्यू हद्द म्हणजे महामार्गासाठी निश्चित केलेल्या अधिकारक्षेत्राची अधिकृत मर्यादा. ही हद्द स्पष्ट नसल्यास रस्त्यालगतच्या बांधकामांची आणि अतिक्रमणांची निश्चित सीमा ठरवताना अडचणी निर्माण होऊ शकतात. त्यामुळे राष्ट्रीय महामार्ग विभागाने अधिकृत नकाशे आणि मंजूर आराखड्यांच्या आधारे प्रत्यक्ष मोजणी करून हद्द निश्चित करावी, अशी मागणी पुढे येत आहे.
महामार्गाची हद्द निश्चित करताना राष्ट्रीय महामार्ग विभाग, भूमी अभिलेख विभाग, महसूल प्रशासन आणि जामखेड नगरपरिषद यांनी समन्वयाने काम करणे आवश्यक आहे. अधिकृत मोजणी पूर्ण करून संबंधित नागरिक आणि व्यापाऱ्यांना वस्तुस्थिती स्पष्ट केल्यास निर्माण झालेला संभ्रम दूर होण्यास मदत होऊ शकते.
रस्त्याचे काम रखडल्याने नागरिकांच्या अडचणी राष्ट्रीय महामार्गाच्या कामाचा प्रश्न मार्गी लागल्यास शहरातील वाहतूक व्यवस्था सुधारण्यास मदत होऊ शकते. रस्त्यालगतच्या अतिक्रमणांचा प्रश्न, अधिकृत हद्दीबाबतची अनिश्चितता आणि मोजणीतील संभाव्य तफावत यावर स्पष्ट निर्णय होणे गरजेचे आहे. त्यासाठी केवळ कारवाई सुरू करण्यापेक्षा आधी अधिकृत हद्द निश्चित करून नियमानुसार पुढील कार्यवाही करणे महत्त्वाचे ठरणार आहे.
प्रशासनाने कालमर्यादा निश्चित करावी राष्ट्रीय महामार्ग अधिकाऱ्यांनी या प्रश्नाकडे गांभीर्याने लक्ष देऊन आरओडब्ल्यू हद्द निश्चित करण्याची प्रक्रिया तातडीने पूर्ण करावी. त्यानंतर रस्त्याच्या कामातील अडथळे दूर करून संपूर्ण प्रश्न कालमर्यादेत मार्गी लावावा, अशी मागणी राहुल उगले यांनी केली आहे.
जामखेडच्या विकासाच्या दृष्टीने महत्त्वाच्या असलेल्या या रस्त्याच्या प्रश्नावर आता संबंधित विभाग कोणती भूमिका घेतात आणि प्रत्यक्ष कामाला कधी गती मिळते, याकडे नागरिकांचे लक्ष लागले आहे.
