पाणीटंचाईचे संकट दारात, प्रशासनाला उशिरा जाग! भुतवडा तलाव परिसरातील विद्युत मोटारी, पाईप, केबल अन् स्टार्टर साहित्य जप्त
जामखेड शहराला पाणीपुरवठा करणाऱ्या भुतवडा तलावातील पाणीसाठा अत्यल्प झाल्याने शहराच्या पाणीपुरवठ्याचा प्रश्न गंभीर होण्याची शक्यता निर्माण झाली आहे. एकीकडे पाण्याची उपलब्धता कमी होत असताना दुसरीकडे पाण्याचा अपव्यय आणि अनधिकृत उपसा रोखण्याचे आव्हान प्रशासनासमोर उभे आहे. या पार्श्वभूमीवर २४ ऑक्टोबर २०२६ रोजी सिंचन विभागाने भुतवडा तलाव परिसरात पाहणी करून पाणी उपशासाठी वापरल्या जाणाऱ्या विद्युत मोटारी, पाईप, केबल, स्टार्टर आणि इतर साहित्य जप्त केले.
मात्र, तलावात पाणीसाठा अत्यल्प झाल्यानंतर ही कारवाई करण्यात आल्याने प्रशासनाला वेळीच जाग आली असती, तर पाण्याच्या नियोजनासाठी आणखी प्रभावी उपाययोजना करता आल्या असत्या, अशी चर्चा नागरिकांमध्ये होण्याची शक्यता आहे. पाणी उपसा रोखण्यासाठी क्षेत्रीय पाहणी जामखेड सिंचन शाखेच्या वतीने भुतवडा तलावात पाणीटंचाईच्या अनुषंगाने अनधिकृत पाणी उपसा रोखण्यासाठी क्षेत्रीय पाहणी करण्यात आली. या पाहणीदरम्यान जलाशयातून प्रत्यक्ष अनधिकृत पाणी उपसा होत नसल्याचे निदर्शनास आल्याचे सिंचन विभागाने स्पष्ट केले.
तथापि, जलाशयाचा विद्युतपुरवठा खंडित केल्यानंतरही तलाव परिसरात पाणी उपशासाठी वापरल्या जाणाऱ्या विद्युत मोटारी, पाईप, केबल, स्टार्टर आणि अन्य साहित्य शेतकऱ्यांनी ठेवले होते. हे साहित्य तलाव परिसरातून हटविण्यासाठी संबंधित शेतकऱ्यांना वारंवार तोंडी सूचना देण्यात आल्या होत्या. मात्र, सूचनांनंतरही साहित्य हटविण्यात न आल्याने अखेर प्रशासनाने ते जप्त करण्याची कारवाई केली.
जप्त साहित्य सिंचन शाखेत जमा कारवाईदरम्यान जप्त करण्यात आलेले साहित्य जामखेड नगर परिषदेच्या वाहनातून लघुपाटबंधारे सिंचन शाखा, जामखेड येथे आणण्यात आले. त्यानंतर सदर साहित्याचा पंचनामा करून ते ठेवण्यात आले.
या कारवाईत सिंचन विभागाचे मोजणीदार एस. पी. निकाळजे, एस. आर. डापसे, कालवा निरीक्षक डी. टी. तायडे, एस. बी. पवार, महावितरणचे कर्मचारी गरडकर व शेख, तसेच नगर परिषदेचे कर्मचारी डोके व गर्जे उपस्थित होते. ही कारवाई अजय लखापती, कनिष्ठ अभियंता तथा जामखेड सिंचन शाखाधिकारी यांच्या मार्गदर्शनाखाली करण्यात आल्याची माहिती देण्यात आली.
जामखेडच्या पाणीपुरवठ्याचे नियोजन महत्त्वाचे भुतवडा तलाव हा जामखेड शहराच्या पाणीपुरवठ्याच्या दृष्टीने महत्त्वाचा जलस्रोत आहे. त्यामुळे तलावातील उपलब्ध पाणीसाठ्याचे काटेकोर नियोजन करणे, पाण्याचा अपव्यय रोखणे आणि अनधिकृत पाणी उपशावर नियंत्रण ठेवणे आवश्यक आहे.
तलावातील पाणीसाठा अत्यल्प झाल्याच्या पार्श्वभूमीवर केवळ साहित्य जप्त करण्यापुरती कारवाई मर्यादित न ठेवता शहराच्या आगामी पाणीपुरवठ्याचे नियोजन, उपलब्ध पाण्याचा काटकसरीने वापर आणि संभाव्य टंचाईवर मात करण्यासाठी ठोस उपाययोजना करण्याची गरज आहे.
चौकट जामखेड शहराला पाणीपुरवठा करणाऱ्या भुतवडा तलावात अत्यल्प पाणीसाठा शिल्लक आहे परिसरात राजरोसपणे मोठ्या प्रमाणात विद्युत पंप चोवीस तास सुरु होते जून जुलै महिन्यात जर प्रशासन जागे झाले असते तर कदाचित शहराला वर्षभर पिण्याचे पाणी पुरले असते आता अत्यल्प पाणीसाठा शिल्लक असताना कारवाई म्हणजे उशीरा सुचलेले शहाणपण अशीच चर्चा सुरू आहे.
