जामखेड न्युज – – – – –
पश्चिम बंगालच्या मुख्यमंत्री ममता बॅनर्जी या विमान अपघातातून थोडक्यात बचावल्या आहेत. दोन विमानं समोरासमोर आल्याननं अपघात झालाय. ममता बॅनर्जी यांच्या छातीला आणि पाठीला दुखापत झाल्याची माहिती आहे. पश्चिम बंगाल विधानसभा निवडणुकीदरम्यान ममता बॅनर्जी यांच्या पायाला दुखापत झाली होती. ममता बॅनर्जी गेल्या आठवड्यात उत्तर प्रदेशच्या दौऱ्यावर होत्या. उत्तर प्रदेशातील प्रचार संपवून परत येत असताना हा प्रकार घडला. विमानाच्या पायलटच्या समयसूचकतेनं मोठी दुर्घटना टळलीय. ममता बॅनर्जी यांच्या विमानाच्या पायलटनं विमान कमी उंचीवरुन वाढवण्याचा निर्णय घेतला. यामुळं दोन्ही विमानांची टक्कर टळली. हे सर्व होत असताना ममता बॅनर्जी यांना किरकोळ दुखापत झाली आहे. त्यांच्या छातीला आणि पाठीला दुखापत झाल्याची माहिती कळतेय.
पायलटची समयसूचकता यशस्वी ठरली
विमानाची समोरासमोर टक्कर होणार होती. मात्र वैमानिकाच्या प्रसंगावधानामुळे मोठा अनर्थ टळलाय. बंगाल सरकारनं शनिवारी याबाबतचा अहवाल मागवला होता. ममता बॅनर्जी यांच्या पाठीला आणि छातीला विमानात दुखापत झाली होती. त्यानंतर बंगाल सरकारनं नागरी विमान वाहतूक महासंचालनालयाकडून याबाबत अहवाल मागलेला. प्रचार संपवून ममता बॅनर्जी या उत्तर प्रदेशातून परतत होत्या. त्यावेळी त्यांच्या विमानाची दुसऱ्या विमानासोबतच समोरासमोर टक्कर होण्याची शक्यता होती. अवघ्या दहा सेकंदाच योग्य पावलं उचलली गेली नसती, तर मोठा अनर्थ घडला असता. पायलटच्या प्रसंगावधानामुळे ममता बॅनर्जी या थोडक्यात बचावल्या आहेत. त्यांच्या पाठीला आणि छातीला दुखापत झाली असल्याचं त्यांनी विधानसभेत पत्रकारांशी बोलताना म्हटलंय.
विमान तातडीनं खाली उतरवलं
ममता बॅनर्जी दसॉल्ट फालकॉन 2000 या विमानातून प्रवास करत असतेवेळी हा प्रसंग घडला. हे 10.3 टनचं विमान असून पायलटला पकडून एकूण 19 जण या विमानातून एकावेळी प्रवास करु शकतात. दरम्यान, वैमानिकानं नेताजी सुभाषचंद्र बोस विमानतळावर हे विमान सुरक्षित उतरवलं. पण त्याआधी विमानांची समोरासमोर टक्कर रोखण्यसाठी पायलटला विमान तातडीनं खाली आणावं लागलं. त्यावेळी विमानात कंप जाणवले आणि त्यातच ममता बॅनर्जी यांना दुखापत झाली.
ममता बॅनर्जी यांनी विमानात नेमकं काय घडलं याची माहिती सोमवारी दिली. पश्चिम बंगाल विधानसभेचे अर्थसंकल्पीय अधिवेशन सध्या सुरु आहे. त्यापूर्वी विमान दुर्घटनेविषयी त्यांनी सांगितलं.
