जामखेड प्रतिनिधी
जामखेड न्युज – – – (सुदाम वराट)
कर्जत-जामखेड मतदारसंघातून जाणाऱ्या राष्ट्रीय महामार्गांसोबतच राज्य व इतर रस्त्यांसाठी भरीव निधी आणण्यासाठी आमदार रोहित पवार यांनी दिल्लीत केंद्रीय भुपृष्ठवाहतूकमंत्री नितीन गडकरी यांची भेट घेतली. यावेळी झालेल्या चर्चेत गडकरी यांनी निधी देण्यास सकारात्मक प्रतिसाद दिल्याची माहिती मिळत आहे. आमदार रोहित पवार हे मतदारसंघाच्या सर्वांगीण विकासासाठी नेहमीच प्रयत्नशील असल्याचे पाहायला मिळते.
कर्जत जामखेड मतदारसंघातून जाणारा चाकण-शिक्रापूर-न्हावरे-श्रीगों दा-जामखेड-बीड ५४८ D हा प्रमुख महामार्ग आहे. या महामार्गापैकी श्रीगोंदा ते जामखेड या टप्प्याला नितीन गडकरी यांनी निधी दिला असून नगरमध्ये माजी केंद्रीय मंत्री शरद पवार आणि गडकरी यांच्या उपस्थितीत या महामार्गाच्या कामाचे भूमीपूजनही झाले आहे. यावेळी या महामार्गावरील जामखेड ते सौताडा या पुढील टप्प्यासाठी गडकरी यांनी मंजुरी दिली. त्यासाठी आता निधीची तरतूद करण्याची विनंती आमदार रोहित पवार यांनी गडकरींना केली. तसेच केंद्रीय रस्ते निधी (सीआरएफ) अंतर्गत प्रत्येक राज्यातील इतर रस्त्यांनाही निधी दिला जातो. त्यानुसार कर्जत-जामखेड मतदारसंघातील राज्य व इतर रस्त्यांच्या कामांसाठीही निधी देण्याची विनंती त्यांनी यावेळी केली.
पैठण ते पंढरपूर हा ७५२ ई पालखी महामार्ग कर्जत-जामखेड मतदारसंघातून जातो. या मार्गावरुन शांतीब्रम्ह श्री. एकनाथ महाराज, संत श्री. भगवानबाबा, संत गोरा कुंभार यांच्यासह इतरही पालख्या लाखो वारकऱ्यांच्या उपस्थितीत दरवर्षी पंढरपूरला जात असतात. खर्ड्यापर्यंत या महामार्गाचे काम झाले आहे. आता कर्जत-जामखेड मतदारसंघातील खर्डा ते कुर्डुवाडी हा पुढील टप्पा राष्ट्रीय मार्ग म्हणून घोषित करण्याची मागणी आमदार रोहित पवार यांनी यापूर्वीच गडकरी यांच्याकडे केली असून याबाबतही या भेटीत चर्चा झाली. हा टप्पा घोषित होऊन त्याचे काम पूर्ण झाल्यास पंढरपूरला जाणाऱ्या लाखो वारकऱ्यांसह नगर, पुणे, उस्मानाबाद, औरंगाबाद, सोलापूर या जिल्ह्यातील नागरिकांनाही दळणवळणासाठी या रस्त्याचा मोठा फायदा होणार आहे. नगर-करमाळा-टेंभुर्णी हा ५१६ A हा रस्ता मोठ्या प्रमाणात खराब झाला झाल्याने दळणवळणाला मोठा अडथळा होतो. त्यामुळे या रस्त्याची लवकरात लवकर दुरुस्ती करण्याची विनंतीही आमदार रोहित पवार यांनी गडकरी यांना केली. त्यावर सर्वतोपरी सहकार्य करण्याचे आश्वासन त्यांनी दिले.
दरम्यान, ‘शामाप्रसाद मुखर्जी राष्ट्रीय रुर्बन मिशन’ अंतर्गत मतदारसंघात एकात्मिक विकास प्रकल्प राबविण्याबाबत आणि केंद्र सरकारकडे प्रलंबित असलेल्या घरकुलांच्या प्रस्तावांना मंजुरी देण्याबाबत केंद्रीय ग्रामविकास व पंचायतराज मंत्री गिरीराजसिंग यांचीही आमदार रोहित पवार यांनी भेट घेतली. तसेच एससी आणि ओबीसी वर्गातील विद्यार्थ्यांसाठी विविध स्पर्धा व प्रवेश परिक्षांचे मार्गदर्शन केंद्र कर्जत-जामखेडमध्ये सुरु करण्याबाबत आणि नगर जिल्ह्यात राष्ट्रीय वयोश्री योजना अधिक प्रभावीपणे राबवण्यासाठी त्यांनी केंद्रीय सामाजिक न्यायमंत्री डॉ. विरेंद्रकुमार यांची भेट घेतली. यावेळी दिव्यांगांच्या सक्षमीकरणासाठी राष्ट्रीय संस्था सुरु करण्याची मागणीही आमदार रोहित पवार यांनी सामाजिक न्याय मंत्र्यांकडे केली.
प्रतिक्रिया –
‘‘विकासासाठी चांगले रस्ते असणे आवश्यक असते. परंतु माझ्या मतदारसंघात रस्त्यांचा मोठा बॅकलॉग आहे. त्यामुळे श्री. नितीन गडकरी साहेब आणि राज्य सरकारच्या माध्यमातून रस्त्यांसाठी अधिकाधिक निधी आणण्याचा माझा प्रयत्न आहे आणि या दोघांकडूनही सहकार्य मिळत असल्याने रस्त्यांची अनेक कामे सुरु आहेत.’’ – रोहित पवार (आमदार, कर्जत-जामखेड)