ल. ना. होशिंग विद्यालयाच्या खेळाडूंची जिल्ह्यात सुवर्णभरारी! पाच जणांची पुणे विभागीय स्पर्धेसाठी निवड
जिल्हास्तरावर आयोजित मैदानी क्रीडा स्पर्धेत विद्यालयातील विद्यार्थ्यांनी उल्लेखनीय कामगिरी करत यशाचा झेंडा फडकावला आहे. थाळीफेक आणि गोळाफेक या क्रीडा प्रकारांत विद्यार्थ्यांनी उत्कृष्ट कामगिरी करून विविध क्रमांक पटकावले असून, पाच खेळाडूंची बालेवाडी, पुणे येथे होणाऱ्या विभागीय स्तरावरील स्पर्धेसाठी निवड झाली आहे. या यशामुळे विद्यालयाच्या क्रीडा क्षेत्रातील लौकिकात भर पडली आहे.
प्रवरानगर येथे झालेल्या जिल्हास्तरीय स्पर्धेत चि. फरहान अन्सार शेख याने थाळीफेक प्रकारात प्रथम क्रमांक मिळवून सुवर्णपदक पटकावले. तसेच चि. पृथ्वीराज संतोष डाडर याने थाळीफेकमध्ये प्रथम क्रमांक आणि गोळाफेकमध्ये तृतीय क्रमांक मिळवत दुहेरी यश संपादन केले. कु. सिद्धी अर्जुन रासकर हिने थाळीफेकमध्ये प्रथम क्रमांक मिळवत आपले क्रीडानैपुण्य सिद्ध केले. तर कु. पायल गणेश गवळी हिने थाळीफेक आणि गोळाफेक या दोन्ही प्रकारांत प्रथम क्रमांक मिळवून विशेष कामगिरी केली. तसेच कु. नेत्रा गणेश गवळी हिने थाळीफेकमध्ये द्वितीय क्रमांक मिळवत यशाला गवसणी घातली.
बालेवाडी, पुणे येथे विभागीय स्पर्धेत खेळाडूंची कसोटी! जिल्हास्तरीय स्पर्धेतील या यशस्वी कामगिरीच्या जोरावर फरहान अन्सार शेख, पृथ्वीराज संतोष डाडर, सिद्धी अर्जुन रासकर, पायल गणेश गवळी आणि नेत्रा गणेश गवळी या पाच खेळाडूंची बालेवाडी, पुणे येथे होणाऱ्या विभागीय स्तरावरील स्पर्धेसाठी निवड झाली आहे. आता विभागीय स्तरावरही हे खेळाडू उत्कृष्ट कामगिरी करून विद्यालयाचे नाव उज्ज्वल करतील, अशी अपेक्षा व्यक्त होत आहे.
विद्यार्थ्यांनी मिळवलेल्या या यशामागे त्यांची मेहनत, जिद्द, नियमित सराव आणि मार्गदर्शकांचे योगदान महत्त्वाचे ठरले आहे. मैदानी क्रीडा प्रकारांत विद्यार्थ्यांनी मिळवलेले हे यश इतर विद्यार्थ्यांसाठीही प्रेरणादायी आहे. यशस्वी खेळाडूंना मार्गदर्शन करणारे क्रीडा शिक्षक राघवेंद्र धनलगडे, बापू जरे, प्रल्हाद साळुंके, धीरज पाटील यांच्या वर सर्व स्तरांतून अभिनंदनाचा वर्षाव! या सर्व यशस्वी खेळाडूंचे दि पिपल्स एज्युकेशन सोसायटीचे अध्यक्ष उद्धवराव देशमुख, सचिव अरुणशेठ चिंतामणी, उपाध्यक्ष दिलीप गुगळे, सहसचिव डॉक्टर सुनील कटारिया, माजी सचिव शशिकांत देशमुख, माजी खजिनदार राजेश मोरे, प्राचार्य बी ए पारखे, उपप्राचार्य युवराज भोसले, उपमुख्याध्यापक अनिल देडे, पर्यवेक्षक सुदाम वराट यांच्यासह सर्व अध्यापक बंधू-भगिनी आणि शिक्षकेतर कर्मचारी यांच्या वतीने हार्दिक अभिनंदन करण्यात आले. तसेच आगामी विभागीय स्पर्धेसाठी त्यांना शुभेच्छा देण्यात आल्या.
जिल्हास्तरावर यशाची पताका फडकावल्यानंतर आता बालेवाडी, पुणे येथे होणाऱ्या विभागीय स्पर्धेतही विद्यालयाचे खेळाडू पदकांची कमाई करणार का, याकडे क्रीडाप्रेमींचे लक्ष लागले आहे.
