पावणे दोन लाखाचे दागिने बसमधून लंपास, जामखेड पोलीस स्टेशनला अज्ञात चोरट्या विरोधात गुन्हा दाखल
नगर वरुन जामखेड येथे एस टी बसने प्रवास करत असताना फिर्यादी महीलेचे पर्स मध्ये ठेवलेले पावणेदोन लाख रुपयांचे दागिने अज्ञात चोरट्याने चोरून नेले. ही घटना बस मधुन महिला उतरत असताना त्यांच्या लक्षात आला. या प्रकरणी जामखेड पोलीस स्टेशनला अज्ञात चोरट्या विरोधात गुन्हा दाखल करण्यात आला आहे.
सध्या जामखेड बस स्थानक हे असून अडचण नसून खोळंबा झाला आहे. या बसस्थानकाचे नवीन काम अतिशय संथ गतीने सुरू आहे. यामुळे या बस स्थानकात प्रवाशांसाठी नीट बसण्याची व्यवस्था नाही. सर्वच प्रवासी एकाच ठिकाणी उभे राहुन बसची वाट पाहत असतात. यावेळी मोठ्या प्रमाणात बसमध्ये चढताना किंवा उतरताना लोकांची गर्दी होते. याच गर्दीचा फायदा जामखेड बस स्थानकामध्ये चोरटे घेत आहेत.
याच अनुषंगाने फिर्यादी महिला कांता प्रकाश चौधर, वय 57 रा. डिफेन्स कॉलनी, जामखेड रोड, निबोंडी, अहिल्यानगर, मुळ, रा. नागोबाचीवाडी, ता. जामखेड या दि 9 जानेवारी 2025 रोजी नगरवरुन आपल्या मुळ गावी नागोबाचीवाडी या ठिकाणी पुणे-कळंब या बसने प्रवास करत होत्या. यानंतर त्यांची बस दुपारी अडीच वाजता जामखेड बस स्थानकात आली यावेळी फिर्यादी या बस मधुन उतरत असताना त्यांची बॅग मध्ये सोने ठेवलेली पर्स चोरीस गेल्याचे लक्षात आले. या पर्स मधिल तीन तोळे वजनाचे गंठण, सोन्याचा नेकलेस, कानातील व गळ्यातील सोन्याचे दागिने असे एकुण 1 लाख 71 हजार रुपयांचे सोन्याचे दागिने चोरुन नेले.
चोरीची घटना जरी बस मध्ये घडलेली असली तरी सध्या सणानिमित्त बस स्थानकात प्रवाशांची मोठी गर्दी होत आहे. याठिकाणी कायम स्वरूपी एक पोलीस कर्मचारी नेमावा ही मात्र प्रवाशांची जुनीच मागणी आहे.
या प्रकरणी फिर्यादी महिला यांनी जामखेड पोलीस स्टेशनला दि 10 जानेवारी 2025 रोजी फिर्याद दाखल केली आहे. अज्ञात चोरट्या विरोधात जामखेड पोलीस स्टेशनला गुन्हा दाखल करण्यात आला आहे. पुढील तपास पोलीस निरीक्षक महेश पाटील यांच्या मार्गदर्शनाखाली पोहेकॉ प्रविण इंगळे हे करत आहेत.