जामखेड न्युज——
आग्रा येथील तीन बूट व्यावसायिकांवर आयकर विभागाचा छापा, नोटा मोजताना मशीनच थकली
आयकर विभागाच्या तपास शाखेने चप्पल, बूट विक्रेत्याच्या घरावर छापेमारी केली. हरमिलाप ट्रेडर्सच्या रामनाथ डंग यांच्या जयपूर हाऊसच्या घरावर अधिकाऱ्यांनी छापा टाकला. या छापेमारीमध्ये कोट्यवधींची रोख रक्कम जप्त करण्यात आली आहे. छापेमारीमध्ये समोर आलेली रक्कम इतकी होती की मोजण्यासाठी मशिन्स मागवाव्या लागल्या. रात्री उशिरापर्यंत मशिन्स आणण्याचे काम सुरू होते. या छापेमारीतील काही फोटो सोशल मीडियावर व्हायरल झाले आहेत. फोटोमध्ये एक बेड दिसत असून त्या बेडवर कोट्यवधींची रोख रक्कम दिसत आहे.
आग्रा येथील चपला व्यावसायिकांच्या जागेवर आयकर विभागाची कारवाई सुरू आहे. कालपासून सुरू झालेली नोटांच्या मोजणीची प्रक्रिया अद्याप थांबलेली नाही. रात्रभर नोटांची मोजणी सुरू होती. सकाळपर्यंत 60 कोटी रुपयांची वसुली झाली आहे.
दरम्यान, नोटा मोजण्याचे यंत्र गरम होऊन थांबले, त्यानंतर काही काळ मोजणी थांबवण्यात आली. या कारवाईत आतापर्यंत 60 कोटी रुपयांची रोकड जप्त करण्यात आली आहे. हा आकडा 100 कोटींच्या पुढे जाण्याची शक्यता आहे.
हरमिलाप ट्रेडर्स, बीके शूज आणि मांशु फुटवेअर यांच्यावर आयकर विभागाची कारवाई सुरू आहे. आग्रा, लखनऊ आणि कानपूरच्या कर्मचाऱ्यांसह तपास शाखेने या व्यावसायिकांच्या सहा ठिकाणी कारवाई केली.
यामध्ये एमजी रोड येथील बीके शूजची आस्थापना आणि सूर्या नगर येथील घराची झडती घेण्यात आली. बुटांचा व्यापार करणाऱ्या मंशु फूटवेअर आणि बीके शूजचे मालक नातेवाईक आहेत आणि गेल्या काही वर्षांत ते बाजारात मोठे नाव बनले आहेत. हरमिलाप ट्रेडर्स शू मटेरियलचे व्यवहार करतात.
तपास शाखेच्या 12 हून अधिक पथकांनी ही कारवाई केली. जमीन आणि सोने खरेदीत मोठ्या प्रमाणात गुंतवणूक झाल्याची माहितीही व्यावसायिकांकडून मिळाली आहे. इनर रिंगरोडजवळ व्यावसायिकांनी मोठी गुंतवणूक केली आहे.
पथकाने लॅपटॉप, संगणक आणि मोबाईल जप्त केले आहेत. त्यांचा डेटाही घेण्यात आला आहे. पावत्या आणि बिलांसह स्टॉक रजिस्टर तपासले आहे. या तपासात अनेक धक्कादायक माहिती समोर आली आहे. एका आस्थापनाच्या ऑपरेटरने त्याचा आयफोन अनलॉक केलेला नाही. व्यवहाराची अनेक गुपिते त्यात दडलेली आहेत.
