जामखेड न्युज——
जीवनातील उच्च ध्येयासाठी विद्यार्थी दशेतच सुरूवात करा – गटशिक्षणाधिकारी बाळासाहेब धनवे
सनराईज शैक्षणिक संकुलामध्ये करिअर मार्गदर्शन मेळावा
आपल्याला जीवनात उच्च ध्येय गाठायचे असेल तर यासाठी चांगल्या सवयी अंगी बानवल्या पाहिजेत. आपण स्वतःला ओळखले पाहिजे. स्वतःचे भविष्य स्वतःच घडवले पाहिजे. कोणतेही क्षेत्र लहान मोठे नाही. आपल्या आवडीनुसार क्षेत्र निवडले तर ध्येय गाठणे अवघड नसते. सर्वात पहिले ध्येय निश्चित करून त्यावर लक्ष्य केंद्रीत केले पाहिजे. आणि हे विद्यार्थीदशेतच करणे गरजेचे आहे. कारण आपण ऐन वेळी ध्येय ठरवायला गेलो तर त्यापासूनच भरकटण्याची शक्यता जास्त असते. म्हणून आजच ते निश्चित करा. असे प्रतिपादन जामखेड पंचायत समितीचे गटशिक्षणाधिकारी बाळासाहेब धनवे यांनी केले.
जामखेड तालुक्यातील पाडळी फाटा येथील सनराईज शैक्षणिक संकुलाच्या स्व.एम.ई. भोरे ज्युनिअर कॉलेज साहेबराव पाटील माध्यमिक विद्यालय येथे दहावी, बारावी नंतरचे महाविद्यालयीन शिक्षण, अभ्यासक्रम व नोकरी मार्गदर्शन यासाठी करीअर मार्गदर्शन मेळाव्याचे आयोजन करण्यात आले होते. यावेळी ते बोलत होते.
यावेळी संस्थेचे संस्थापक अध्यक्ष डॉ. संजय भोरे, संकुलाच्या प्राचार्या अस्मिता जोगदंड (भोरे), संजय वारभोग, नंदू परदेशी, धनराज पवार, प्रा. विनोद बहीर, प्रदीप भोंडवे, प्रा. दादासाहेब मोहिते,अमोल कसाब, नारायण आयकर, प्रल्हाद डिसले, सागर कदम, श्रीमती स्वाती पवार, सुष्मा भोरे, सविता काळे, तेजस भोरे, यशराज भोरे, शिकेतर कर्मचारी दिनकर सरगर, महेश पाटील, हनुमंत वाघमारे, बुवा साहेब दहिकर , अविनाश भोरे आदी विद्यार्थी मोठ्या संख्येने उपस्थित होते.
यावेळी गटशिक्षणाधिकारी धनवे म्हणाले की, करिअरच्या क्षेत्रात मेडिकल-इंजिनिअरिंग शिवायही अनेक क्षेत्रे आहेत त्यात तुम्ही उत्तुंग भरारी घेऊ शकता. यु. पी. एस.सी, एम. पी. एस.सी. संशोधन याबरोबरच तुम्ही मोठे उद्योग व्यवसायही उभ करू शकता. यासाठी तुम्हाला मार्गदर्शन करण्यास मी नेहमीच तयार आहे. तसेच त्यांनी सांगितले की, मी आल्यापासून जामखेड तालुक्यातील दुर्गम ठिकाणच्या शाळांमधील विद्यार्थी गुणवत्तेत पुढे येत आहेत. शिक्षक, पालक व ग्रामस्थांचाही शैक्षणिक उपक्रमांमध्ये सहभाग वाढला आहे. यावेळी त्यांनी अनेक यशस्वी व्यक्तीची उदाहरणे देऊन विद्यार्थ्यांचा उत्साह वाढवला. त्यांनी संवादरूपी केलेल्या मार्गदर्शनास विद्यार्थ्यांनी उत्स्फूर्त प्रतिसाद दिला.
यावेळी बोलताना संस्थेचे अध्यक्ष डॉ. संजय भोरे म्हणाले की, ही संस्था आपल्या विद्यार्थ्यांच्या शैक्षणिक प्रगतीसाठी काम करतेच परंतु समाजातील विविध घटकांसाठीही अनेक उपक्रम राबवत असते. आजच्या अधुनिक युगात मुलांना चांगले शिक्षण मिळण्याबरोबरच करिअर मार्गदर्शन मिळणेही आवश्यक आहे म्हणून आज गटशिक्षणाधिकारी बाळासाहेब धनवे यांचे मार्गदर्शन ठेवले.
जामखेड तालुक्यातील शैक्षणिक क्षेत्रात आलेली मरगळ झटकण्याचे काम धनवे साहेब करत आहेत. त्यांच्यामुळे तालुक्यात विद्यार्थ्यांची गुणवत्ता कमालीची सुधारली आहे. त्याचा फायदा स्व.एम.ई. भोरे ज्युनिअर कॉलेज साहेबराव पाटील माध्यमिक विद्यालय नक्कीच होईल असे मत सनराईज शैक्षणिक स्कूलचे संस्थापक अध्यक्षडॉ. संजय भोरे यांनी व्यक्त केले. यावेळी पत्रकार नंदू परदेशी यांनीही आपले मनोगत व्यक्त केले.
या कार्यक्रमाची सुरुवात छ. शिवाजी महाराज व सावित्रीबाई फुले यांच्या प्रतिमा पुजनाने झाली. कार्यक्रमाचे सुत्रसंचालन दादासाहेब मोहिते यांनी तर आभार चंद्रकांत सातपुते मानले.
कार्यक्रमानंतर गटशिक्षणाधिकारी बाळासाहेब धनवे यांनी शाळेची पाहणी केली व याठिकाणी असलेल्या सोयीसुविधा व शैक्षणिक गुणवत्तेबद्दल समाधान व्यक्त केले. तसेच काही अडचण असेल तर योग्य ते सहकार्य करण्याचे आश्वासन दिले.
