जामखेड न्युज – – – –
करोनाच्या ओमिक्रॉन व्हेरिएंटने भारतात शिरकाव केला असताना व या व्हेरिएंटचे रुग्ण वाढत असताना इंडियन मेडिकल असोसिएशन (आयएमए) या देशातील वैद्यकीय क्षेत्रातील प्रमुख संघटनेने धोक्याचा इशारा दिला आहे. आयएमएने पत्रकार परिषद घेत करोनाची तिसरी लाट, बूस्टर डोस, निर्बंध यावर महत्त्वाची मते मांडली आहेत.
ओमिक्रॉन व्हेरिएंटचा प्रकोप टाळायचा असेल तर तातडीने काही पावले उचलण्याची गरज आहे. कठोर निर्बंध लावले पाहिजेत असे आम्ही म्हणत नाही मात्र कोविड नियम काटेकोरपणे पाळले जावेत यासाठी पुरेशा उपाययोजना केल्या पाहिजेत. ते झाले नाही तर भारतात करोनाची तिसरी मोठी लाट पाहायला मिळू शकते, अशी भीती आयएमएने व्यक्त केली. ही वेळ घाबरून जाण्याची नाही तर सतर्कता बाळगून ओमिक्रॉनला रोखण्याची आहे, असेही आयएमएने नमूद केले.
आयएमएचे अध्यक्ष डॉ. जे. ए. जयलाल आणि सरचिटणीस जयेश एम. लेले यांनी पत्रकार परिषद घेऊन अनेक मुद्दे मांडले. ओमिक्रॉन आता ४० हून अधिक देशांत पसरला आहे. त्यात भारताचाही समावेश आहे. हा व्हेरिएंट डेल्टापेक्षा कमी घातक असला तरी याचा फैलाव डेल्टापेक्षा पाच ते दहा पटीने जास्त आहे. त्यामुळेच आपल्याला खबरदारी घ्यावी लागेल, असे जयलाल व लेले म्हणाले. कोविड नियमांचे पालन काटेकोरपणे व्हायला हवे. प्रवासबंदी घालण्याची गरज नाही मात्र गरज असेल तरच प्रवास करा, असा आमचा सल्ला राहील. सरकारने प्रामुख्याने गर्दी रोखण्यासाठी तातडीने पावले उचलायला हवीत, असेही त्यांनी नमूद केले.
ओमिक्रॉन व्हेरिएंटमुळे नवे संकट उभे ठाकले आहे. अशावेळी आरोग्याच्या आघाडीवर आपण सज्ज असलं पाहिजे आणि सक्षमही असलं पाहिजे. यासाठी या महामारीत कोविड योद्धे म्हणून जे आरोग्य कर्मचारी काम करत आहेत त्यांना कोविडवरील तिसरी लस देण्याबाबत विचार केला गेला पाहिजे. वैद्यकीय महाविद्यालयांमध्ये प्रवेश प्रक्रियाही लवकरात लवकर पूर्ण केली गेली पाहिजे, अशी आग्रही मागणी आयएमएने सरकारकडे केली.
