शेजारच्या आष्टीला कृष्णा प्रकल्पाचे पाणी, जामखेडकरांच्या घशाला कोरड! सभापती राम शिंदे अन् रोहित पवारांचा दबदबा गेला कुठे?
शेजारच्या आष्टी तालुक्यात कृष्णा-मराठवाडा प्रकल्पाचे पाणी पोहोचत असल्याचे चित्र असताना, दुष्काळी जामखेड तालुका मात्र पाण्यासाठी तहानलेलाच आहे. जामखेड शहरातील नागरिकांना पंधरा दिवसांतून एकदा अवघा तासभर पाणी मिळत असल्याने नागरिकांमध्ये तीव्र नाराजी व्यक्त होत आहे.
२००९ पासून चर्चेत असलेल्या या महत्त्वाकांक्षी प्रकल्पाचा लाभ जामखेडला मिळवून देण्यासाठी आजवर नेमके कोणते प्रयत्न झाले, असा सवाल उपस्थित होत आहे. राज्याच्या राजकारणात प्रभाव असलेले सभापती प्रा. राम शिंदे आणि आमदार रोहित पवार यांनी या प्रश्नावर ठोस पाठपुरावा केला आहे का, याची माहिती जनतेसमोर येणे गरजेचे आहे.
प्रकल्पाचे पाणी जामखेडपर्यंत आणण्यासाठी तांत्रिक अडचणी कोणत्या आहेत? त्यावर उपाययोजना करण्यासाठी शासनदरबारी पाठपुरावा का होत नाही? या प्रश्नांची उत्तरे लोकप्रतिनिधींनी द्यावीत, अशी अपेक्षा नागरिक व्यक्त करत आहेत.
राज्याच्या राजकारणात नेत्यांचा दबदबा असताना जामखेडच्या पाण्याचा प्रश्न कायम का? शेजारच्या तालुक्यात पाणी पोहोचत असेल, तर जामखेडला कायम प्रतीक्षाच का? या प्रश्नांवर आता ठोस निर्णय होऊन जामखेडकरांना कायमस्वरूपी पाणीपुरवठ्याचा मार्ग मोकळा होणार का, याकडे सर्वांचे लक्ष लागले आहे.
शेजारच्या तालुक्यात पाणी पोहोचत असताना जामखेडकरांनी मात्र तहानलेलेच राहायचे का? हा प्रश्न आता केवळ राजकीय चर्चेचा विषय राहिलेला नाही; तो जामखेडच्या जनतेच्या जगण्याशी जोडलेला आहे. जामखेडकरांची मागणी स्पष्ट आहे —पाणीप्रश्नावर राजकारण नको, ठोस कृती हवी; आश्वासने नकोत, कायमस्वरूपी पाणीपुरवठ्याचा मार्ग हवा!
