जामखेड न्युज——
मागच्या दारानी आलेल्या आमदारांनी मतदारसंघातील प्रश्न मांडण्याऐवजी बारामती अँग्रो, प्रांत तहसीलदार यांच्यावर कारवाई साठी प्रतिष्ठा पणाला लावली – आमदार रोहित पवार
मागच्या दाराने आलेल्या आमदाराची “स्थगिती” आमदार म्हणून ख्याती
पवारांच्या नादी कोणी लागू नये पवार वरून शांत पण आतून अशांत असतात.
कर्जत जामखेड मतदारसंघात अनेक प्रश्न प्रलंबित आहेत. गेल्या आठ महिन्यांपासून अतिवृष्टीने बाधित शेतकऱ्यांना अद्याप मदत नाही. हे प्रश्न मांडण्याऐवजी बारामती अँग्रोवर कारवाई, प्रांताधिकारी, तहसीलदार यांच्यावर कारवाई साठी मागच्या दाराने आलेल्या आमदाराने आपली प्रतिष्ठा पणाला लावली आहे. पण त्यांना एक सांगतो पवारांच्या नादी कोणी लागू नये पवार वरून शांत व आतून अशांत असतात असा इशारा आमदार रोहित पवार यांनी आमदार प्रा. राम शिंदे यांचे नाव न घेता दिला.
आमदार रोहित पवार व जिल्हा बँकेचे संचालक अमोल राळेभात यांच्या नेतृत्वाखालील सरकार व शेतकरी विकास पॅनलच्या नवनिर्वाचित उप सभापती व संचालकांना आमदार रोहित पवार यांच्या हस्ते सत्कार करण्यात आला तसेच सोसायटी व ग्रामपंचायत सदस्य, व्यापारी व हमाल यांचे आभार कार्यक्रम संपन्न झाला
यावेळी आमदार रोहित पवार, राष्ट्रवादी काँग्रेसचे कर्जत जामखेड विधानसभा प्रमुख प्रा. मधुकर राळेभात, माजी सभापती संजय वराट, जिल्हा बँकेचे संचालक अमोल राळेभात, कृषी उत्पन्न बाजार समितीचे व्हाईस चेअरमन कैलास वराट, संचालक सुधीर राळेभात, अंकुशराव ढवळे,
सतिश शिंदे, गजानन शिंदे, विठ्ठल चव्हाण, सुरेश पवार, राहुल बेदमुथ्था, नारायण जायभाय, सावळेश्वर उद्योग समूहाचे रमेश आजबे, राजुरीचे सरपंच सागर कोल्हे, साकतचे सरपंच हनुमंत पाटील, विश्वनाथ राऊत, अक्षय शिंदे, विजयसिंह गोलेकर, दादा उगले, काकासाहेब कोल्हे, बापू कार्ले, काका चव्हाण, शहादेव वराट, प्रा. महादेव डुचे, शरद शिंदे, विजय पवार, राजाभाऊ वराट, महादेव वराट, यांच्या सह तालुक्यातील सरपंच, ग्रामपंचायत सदस्य, सेवा संस्थेचे चेअरमन, सदस्य मोठ्या संख्येने उपस्थित होते.
यावेळी बोलताना आमदार रोहित पवार म्हणाले की, सध्या मतदारसंघात दबावाचे राजकारण सुरू आहे. पण दबाव टाकून जास्त दिवस मते मागता येत नाहीत. कर्जत जामखेड मतदारसंघाचे नाव देशात आदराने घेतले पाहिजे असे काम आपण करणार असे सांगितले.
तसेच या निवडणुकीमुळे मी सावध झालो आहे. काही गणित चुकले याचे आत्मपरीक्षण करून जे आपल्या बरोबर होते त्यांना ताकद देऊ ज्यांचा पराभव झाला त्यांनी हिम्मत हरवू नका. या निवडणुकीची चर्चा संपूर्ण महाराष्ट्रात सुरू आहे. पण कोणी काम केले कोणी केले नाही खासदार गटाने काय केले याचीच चर्चा सुरू आहे.
आमदार प्रा. शिंदे यांना शेतकऱ्यांची एवढी काळजी होती तर हळगाव कारखाना त्यांनी घ्यावयास हवा होता. शेतकऱ्यांना फायदा झाला असता. मतदारसंघात अनेक कामे मंजुरी आणलेली असताना विकास होत असताना मागील दाराने आलेले आमदार स्थगिती आणण्याचे काम करत आहेत. यामुळे सध्या “स्थगिती” आमदार म्हणून त्यांची ख्याती आहे.
जामखेड तालुक्यातील दोन खेळाडूंची कझाकिस्तान येथे होणाऱ्या एशियन सँम्बो स्पर्धेत निवड झाली आहे याचा सार्थ अभिमान आहे असे सांगताच दोन्ही खेळाडूंना प्रत्येकी पन्नास हजार रुपये विमान प्रवासासाठी मदत केली तसेच पोलीस दलात भरती झालेल्या तरुणांचा सत्कार करण्यात आला.
