जामखेड न्युज——
नाशिक पदवीधर मतदारसंघासाठी काँग्रेस कडून सुधीर तांबे यांच्या नावाची घोषणा तर भाजपाकडून राजेंद्र विखेंची शक्यता
विखे – थोरात सामना रंगवण्याची शक्यता
नाशिक पदवीधर मतदारसंघासाठी काँग्रेस पक्षाकडून (Congress) विद्यमान आमदार डॉ. सुधीर तांबे (Dr. Sudhir Tambe) हे उमेदवार असतील, असे प्रदेशाध्यक्ष नाना पटोले (Nana Patole) यांनी आज (ता. ७ ऑक्टोबर) जाहीरपणे सांगितले. डॉ. तांबे हे गेली तीन टर्मपासून या मतदासंघाचे प्रतिनिधीत्व करत आहेत. काँग्रेसचे ज्येष्ठ नेते, माजी महसूल मंत्री बाळासाहेब थोरात यांचे ते मेहुणे आहेत. तर भाजपाकडून राजेंद्र विखे पाटील यांचे नाव चर्चेत आहे. त्यामुळे विखे व थोरात सामना परत रंगणार अशी चिन्हे दिसत आहेत.
नाना पटोले म्हणाले की, विधान परिषदेच्या पदवीधर आणि शिक्षक मतदारसंघाच्या निवडणुका लागल्या आहेत. नागपूर आणि कोकण शिक्षक मतदारसंघ, तर अमरावती आणि नाशिक पदवीधर मतदारसंघाचा त्यात समावेश आहे. नाशिक पदवीधरमध्ये आमदार डॉ. सुधीर तांबे हे आमचे उमेदवार आहेत. इतर उमेदवार निश्चित झालेले नाहीत.
शिक्षक आणि पदवीधरचे चारही मतदारसंघ काँग्रेसकडे आहेत. महाविकास आघाडीमध्ये जे निर्णय घेतले, त्याप्रमाणे आम्ही काम करतोय, असेही नाना पटोले यांनी या वेळी सांगितले.
दरम्यान, नाशिक पदवीधर मतदारसंघात नाशिक, नगर, जळगाव, धुळे, नंदुरबार या पाच जिल्ह्यांचा समावेश आहे. माजी मंत्री थोरात आणि आमदार तांबे यांचा शिक्षण संस्थांच्या माध्यमातून या पाच जिल्ह्यांत मोठा संपर्क आहे. तसेच, महाविकास आघाडीचा फायदाही तांबे यांना होऊ शकतो.
या मतदारसंघासाठी भाजपचे नेते तथा विद्यमान महसूल मंत्री राधाकृष्ण विखे पाटील यांचे बंधू राजेंद्र विखे पाटील यांचे नाव चर्चेत आहे. राजेंद्र विखे पाटील यांनी सावित्रीबाई फुले पुणे विद्यापीठाच्या सिनेटमध्ये तब्बल २० वर्षे काम केले आहे. ते विद्यापीठाच्या व्यवस्थापन, विद्वावता, आणि सल्लगार परिषदेचे सदस्यही होते. लोणीतील प्रवरा आरोग्य अभिमत विद्यापीठचे ते कुलपती आहेत. भाजपकडून विखेंना उमेदवारी मिळाल्यास नगरमधील विखे-थोरात यांच्यातच खऱ्या अर्थाने सामना रंगू शकतो.
