जामखेड प्रतिनिधी
जामखेड न्युज – – (सुदाम वराट)
आमदार रोहित पवारांच्या संकल्पनेतून सर्वात उंच भगवा ध्वजाची खर्डा येथिल शिवपट्टण किल्ल्यावर आज विजयादशमीच्या मुहूर्तावर साधुसंत महंत व हजारो लोकांच्या उपस्थित मोठ्या उत्साहात संपन्न झाला मोठ्या प्रमाणावर जनसमुदाय उपस्थित होता कार्यक्रम झाल्यावर आमदार रोहित पवारांनी परत एक आदर्श महाराष्ट्रातील तरूणांसमोर ठेवला कार्यक्रमानंतर स्वतः स्वच्छता करत परिसरातील पडलेला कचरा मोकळ्या पाण्याच्या बाटल्या गोळा करत डस्टबीन मध्ये टाकला आमदार रोहित पवार स्वतः स्वच्छता करत आहेत म्हटल्यावर बरोबर असलेल्या कार्यकर्त्यांनी पटापट कचरा गोळा करत परिसर चकाचक केला त्यामुळे आमदार रोहित पवारांनी आपल्या कृतीतून आदर्श निर्माण केला आहे.
सर्वात उंच भगवा ध्वज आज खर्डा येथिल शिवपट्टण किल्ल्यावर डोलाने फडकला या सोहळ्याला विद्यमान आमदार संजय दौंड, आमदार बाळासाहेब आजबे, आमदार संजय मामा शिंदे, आमदार संदीप भैय्या क्षीरसागर, माजी आमदार राहुल भैय्या मोटे, माजी आमदार मधुसूदन केंद्रे हे उपस्थित होते. शिवाय या सोहळ्यात आदर्श शिक्षक रणजित डिसले, आखील भारतीय वारकरी संघटनेचे अध्यक्ष हभप प्रकाश महाजन बोधले, ह.भ.प जलाल महाराज सय्यद, फणसकिंग हरिश्चंद्र देसाई, कोविड योद्धा अक्षय कोठावळे, मुंबई डब्बेवाला संघाचे प्रवक्ता रितेश आंद्रे, वन्यजीव संवर्धक बंडू धोत्रे, पॅराऑलिम्पिक तरणपटू सुयश जाधव, नौकानयनपटू दत्तू भोकानाळ, मसाला क्विन उद्योजिका कमलताई परदेशी, बीज संवर्धक शेतकरी राहीबाई पोपरे, प्रगतीशील शेतकरी ज्ञानेश्वर बोडके व विलास शिंदे, दुग्धव्यावसायिका श्रद्धा धवन, घोंगडी निर्माणकार जगू कुचेकर, डॉ. फॉर बेगर्स या एनजीओचे संस्थापक-अभिजित सोनावणे, ऑक्सिजन मॅन शाहनवाझ शेख आणि हिदायत माणेर, सर्पमित्र राजेश ठोंबरे, बारीपाडा या आदर्श आदीवासी गावाचे सरपंच चैत्राम पवार, युवा शास्त्रज्ञ करीश्मा इनामदार, युवा एस्ट्रोफोटोग्राफर पथमेश जाजू, तमाशा कलावंत मंगलाताई बनसोडे, गायक अवधूत गांधी, स्त्री भ्रूण हत्येविरोधात कार्य करणारे . गणेश राख, युवा साहित्य अकादमी विजेता लेखक नवनाथ गोरे, सनदी अधिकारी मोनिका कांबळे, पेंटॅथ्लॉनिस्ट क्रिडापटू .अजिंक्य बालवडकर आणि कुस्तीपटू काळे यांचा सन्मान करण्यात आला. शहिद कॅप्टन विनायक गोरे यांच्या मातोश्री अनुराधा गोरे यांच्या हस्ते स्वराज्य ज्योत प्रज्वलित करण्यात आली.
कर्जत-जामखेड तालुक्याला नवी ओळख मिळवून देणारा हा स्वराज्य ध्वज अनेकांसाठी आता आदर्श प्रेरणा बनला आहे. महाराष्ट्राच्या शौर्यशाली परंपरेतून जन्मलेल्या, एकतेची-बंधुत्वाची हाक देणा-या व ७४ मीटर अशा विक्रमी उंचीने सर्वांच्या मनात भरलेल्या भगव्या स्वराज्य ध्वजाने थोड्याच दिवसात अथक यात्रेकरवी जनमानसात आणि देशभरातही महाराष्ट्राच्या करारी इतिहासाची ओळख पोहोचवण्यात मोठं योगदान दिलं आहे. ३७ दिवसांचा अहोरात्र प्रवास करत, ९६ शक्तीपीठे आणि प्रेरणास्थळांना वंदन करत, महाराष्ट्रातील ३६ जिल्हे व इतर पाच राज्यांना भेट देऊन पुन्हा राज्यात पोहोचलेला हा भगवा स्वराज्य ध्वज आता कायमच उंच झळकून आपल्या सर्वांना छत्रपती शिवाजी महाराजांच्या आदर्श स्वराज्यधर्माची आठवण करून देत राहाणार आहे
हिंदवी स्वराज्य संस्थापक, छत्रपती शिवाजी महाराजांच्या ६ जून १६७४ रोजी झालेल्या राज्याभिषेकाचे स्मरण म्हणून या ध्वजाची उंची ७४ मीटर ठेवण्यात आली आहे. या ध्वजाचा आकार ९६X६४ फूट आहे. ध्वज स्तंभाचे वजन १८ टन असून नुसत्या ध्वजाचे वजन ९० किलो आहे. साडे पंचावन्न हजार चौरस फूट आकार असलेला हा ध्वज देशात सर्वांचे आकर्षण ठरला आहे. असा हा मंगल ध्वज कर्जत-जामखेडवासियांसाठी सध्या अभिमानाचा विषय आहे. या किल्ल्याची निर्मिती सरदार राजे निंबाळकर यांनी १७४३ साली केली होती. इ.स १७९५ मध्ये अहमदनगर जवळ खर्डा या ठिकाणी हैदराबादच्या निजामाला मराठ्यांनी पाणी पाजले. हि अखेरची शौर्यगाथा याच शिवपट्टण किल्ल्याच्या परिसरात लिहिली गेली. हा ऐतिहासिक किल्ला जामखेड जवळ खर्डा या ठिकाणी आजही भरभक्कम अवस्थेत उभा आहे. अभेद्य तटबंदी असणारा हा किल्ला सहा खणखणीत बुरुजांनी संरक्षित आहे. आता येत्या दस-याला अवघ्या राज्याचं नवं स्वप्न असणा-या या भगव्या स्वराज्य ध्वजाची सन्मानाने दिमाखदार प्रतिष्ठापना झाली आहे आणि पुन्हा एकदा या किल्ल्यासमोर नवा विक्रमी इतिहास रचला गेला आहे.
जसा सर्वात उंच भगवा ध्वज उभारत आमदार रोहित पवारांनी एक इतिहास निर्माण केला आहे. समतेचा एकतेचा स्वराज ध्वज उभारणी झाल्यावर आमदार रोहित पवारांनी स्वतः परिसराची स्वच्छता करत एक आदर्श निर्माण केला आहे.
