दुष्काळाचा सामना एकजुटीने करा, बांधावरून वाद नको, पोलीस ठाण्यात तक्रार नको! — मनोज जरांगे पाटील साकतनगरीत भक्तीचा जागर, रामचंद्र बोधले महाराज पुण्यतिथीनिमित्त अखंड हरिनाम सप्ताहाचा भव्य शुभारंभ

जामखेड न्युज – – – – – 

दुष्काळाचा सामना एकजुटीने करा, बांधावरून वाद नको, पोलीस ठाण्यात तक्रार नको! — मनोज जरांगे पाटील

साकतनगरीत भक्तीचा जागर, रामचंद्र बोधले महाराज पुण्यतिथीनिमित्त अखंड हरिनाम सप्ताहाचा भव्य शुभारंभ

सध्या दुष्काळाचे भयानक संकट आपल्या समोर उभे आहे. या संकटाचा सामना करण्यासाठी सर्वांनी एकजुटीने पुढे येऊन एकमेकांना सहकार्य करावे. शेतकऱ्यांनी एकमेकांच्या बांधावरून वाद घालू नयेत, एकमेकांचे बांध कोरू नयेत आणि गावातील एकाही व्यक्तीची तक्रार पोलीस ठाण्यापर्यंत जाणार नाही, याची काळजी घ्यावी, तसेच शेतीला जोडधंदा म्हणून नोकरी व व्यवसाय या क्षेत्रात उतरा याशिवाय प्रगती शक्य नाही असे मराठा संघर्ष योद्धा मनोज जरांगे पाटील यांनी केले.

साकत येथे श्री सद्गुरू रामचंद्र बोधले महाराज यांच्या ४४ व्या पुण्यतिथीनिमित्त ह. भ. प. उत्तम महाराज वराट यांच्या नेतृत्वाखाली आयोजित भव्य अखंड हरिनाम सप्ताहाचा शुभारंभ मनोज जरांगे पाटील यांच्या हस्ते करण्यात आला. यावेळी भव्य अशी मिरवणूक काढण्यात आली. यावेळी ते बोलत होते. या धार्मिक सोहळ्याला संत-महंत, वारकरी, विविध क्षेत्रांतील मान्यवर आणि तरुणांनी मोठ्या संख्येने उपस्थिती लावली.

दुष्काळात एकमेकांना आधार द्या!
यावेळी मनोज जरांगे पाटील यांनी दुष्काळाच्या पार्श्वभूमीवर ग्रामस्थांना एकजुटीचे महत्त्व पटवून दिले. दुष्काळाचे संकट गंभीर असून, अशा परिस्थितीत समाजातील प्रत्येकाने एकमेकांच्या पाठीशी उभे राहणे गरजेचे आहे. पाणी आणि शेतीच्या प्रश्नांवरून आपापसांत वाद निर्माण करण्याऐवजी सामंजस्याने मार्ग काढावा. शेतकऱ्यांनी एकमेकांच्या बांधावरून वाद करू नयेत. गावातील वाद गावातच सामोपचाराने मिटवावेत. कोणत्याही कारणामुळे पोलीस ठाण्यापर्यंत तक्रार जाणार नाही, यासाठी सर्वांनी प्रयत्न करावेत, असे त्यांनी सांगितले.

तरुणांनो, व्यसनापासून दूर राहा!
तरुणांना मार्गदर्शन करताना जरांगे पाटील म्हणाले की, तरुणांनी व्यसनांच्या आहारी जाऊ नये. समाजात एकजूट कायम ठेवून सामाजिक कार्यात सक्रिय सहभाग घ्यावा. गावातील गोरगरीब, गरजू आणि अडचणीत असलेल्या लोकांना मदत करावी. समाजातील प्रत्येक घटकाला सोबत घेऊन पुढे जाण्याची भूमिका तरुणांनी स्वीकारावी. समाजाची ताकद ही एकजुटीत असून, परस्पर सहकार्य आणि सामाजिक बांधिलकीतूनच गावाचा विकास साधता येतो, असा संदेश त्यांनी दिला.

साकतनगरीत भक्ती आणि अध्यात्माचा जागर!
श्री सद्गुरू रामचंद्र बोधले महाराज यांच्या ४४ व्या पुण्यतिथीनिमित्त आयोजित अखंड हरिनाम सप्ताहामुळे साकत परिसरात भक्तिमय वातावरण निर्माण झाले आहे. ह. भ. प. उत्तम महाराज वराट यांच्या नेतृत्वाखाली या सोहळ्याचे आयोजन करण्यात आले असून, हरिनाम, कीर्तन आणि संतविचारांच्या माध्यमातून आध्यात्मिक संस्कारांचा जागर केला जात आहे.

या सप्ताहाच्या शुभारंभप्रसंगी संत-महंत, वारकरी संप्रदायातील मान्यवर, ग्रामस्थ आणि तरुण मोठ्या संख्येने उपस्थित होते. धार्मिक कार्यक्रमाच्या निमित्ताने मनोज जरांगे पाटील यांनी दुष्काळ, शेतकऱ्यांमधील सलोखा, व्यसनमुक्ती आणि सामाजिक एकजुटीचा दिलेला संदेश उपस्थितांसाठी महत्त्वपूर्ण ठरला.
दुष्काळाच्या संकटात एकमेकांना मदतीचा हात द्या, आपापसांतील वाद टाळा आणि समाजातील गोरगरिबांच्या पाठीशी उभे राहा, हा संदेश साकतनगरीतील या धार्मिक सोहळ्यातून देण्यात आला.