मतदानासाठी लांबच लांब रांगा, दोन्ही उमेदवाराच्या पैसे वाटपाच्या घटना
राज्यातील हायहोल्टेज लढतीपैकी कर्जत जामखेड च्या लढतीकडे पाहिले जात होते. सर्वच ठिकाणी चुरशीने मतदान झाले. जामखेड शहरातील केंद्रावर सकाळ पासून गर्दी होती त्यामुळे मतदारांना ताटकळत उभे राहावे लागले. सकाळी अकरा वाजेपर्यंत मतदान अवघे 20 टक्के झाले होते. यानंतर मात्र मतदानासाठी नागरीकांनी गर्दी केली होती. दुपारनंतर मतदार मोठ्या संख्येने बाहेर पडले होते जामखेड शहरातील काही मतदान केंद्र सुशोभित केले होते. फक्त महिला कर्मचारी व अपंग कर्मचारी असलेले मतदान केंद्र लक्षवेधी ठरले. जामखेड तालुक्यातील नान्नज येथे मंगळवारी व बुधवारी मतेवाडी तसेच कर्जत येथे लकी हॉटेल येथे पैसे वाटप प्रकार घडला याबाबत गुन्हे दाखल झाले आहेत. जामखेड व कर्जत तालुक्यात किरकोळ प्रकार वगळता कोठेही अनुचित प्रकार घडला नाही रात्री उशीरापर्यंत 75 . 15 टक्के मतदान झाल्याची माहिती मिळाली आहे.
कर्जत जामखेड मतदारसंघात महायुतीचे उमेदवार प्रा. राम शिंदे व महाविकास आघाडीचे उमेदवार रोहीत पवार यांच्यात सरळ लढत लक्षवेधी ठरणार असल्याने या मतदारसंघावर निवडणूक आयोगाने विशेष लक्ष केंद्रित केले होते व मोठय़ा प्रमाणावर सुरक्षा व्यवस्था पुरविण्यात आली होती. सकाळी आठ वाजता आ. राम शिंदे यांनी कुटुंबासह चोंडी येथील मतदान केंद्रावर मतदानाचा अधिकार बजावला. निवडणूक अधिकारी यांनी जामखेड शहरातील आदर्श मतदान केंद्र म्हणून नागेश कन्या विद्यालय तसेच युवा कर्मचारी संचलित मतदान केंद्र नागेश कन्या विद्यालय व पडदा नशीन मतदान केंद्र जि. प. प्राथ. मुलांची शाळा, जामखेड येथे तयार केले होते.
जामखेड शहरसह तालुक्यातील मतदान केंद्रावर सकाळी अकरा वाजेपर्यंत अल्पसा प्रतिसाद होता. दुपारी बारा नंतर मतदार मतदानासाठी बाहेर पडला होता. 96 नंबरच्या केंद्रांवर एकुण मतदार संख्या १४७६ असल्यामुळे लांबच लांब रांगा लागल्या होत्या. हजारापेक्षा जास्त मतदान असेल तर दुसरे केंद्र केले पाहिजे. एक मतदान प्रक्रिया होण्यासाठी वीस सेकंद लागतात एकच मशीन असल्याने गर्दी होती त्यामुळे मतदारांना ताटकळत उभे राहावे लागले. अरणगाव, पिंपरखेड, जवळा याठिकाणी लांबच्या लांब रांगा मतदानासाठी लागल्या होत्या. मतदान केंद्राच्या दोनशे मिटर अंतरावर राम शिंदे व रोहीत पवार यांचे बुथ ठिक ठिकाणी लागले होते व मोठय़ा प्रमाणावर कार्यकर्ते असल्याने मतदान आणण्यासाठी चुरस लागली होती. यावेळी महिला मतदार मतदानासाठी मोठ्या प्रमाणावर बाहेर पडल्या होत्या त्यामुळे सर्वच मतदार केंद्रात गर्दी होती.
तालुक्यातील डोळेवाडी येथील गयाबाई रामभाऊ डोळे या शंभर वर्षांच्या आजीबाईने कोणाचाही आधार न घेता मतदानाचा हक्क बजावला तसेच मतदार संघातील जे मतदार बाहेर आहेत त्यांना आणण्यासाठी राजकीय पक्षांनी येण्या जाण्यासाठी वाहनांची सोय केली होती त्यामुळे मतदानाची टक्केवारी वाढली आहे. संध्याकाळी सहा वाजेपर्यंत अनेक मतदान केंद्रांवर रांगा असल्याने मतदान होण्याची प्रक्रिया रात्री आठ वाजेपर्यंत चालणार असल्याचे चित्र आहे.
आ. रोहीत पवार व राम शिंदे यांनी सकाळी आठ वाजल्या पासून कर्जत व जामखेड येथील मतदान केंद्रावर जाऊन भेटी गाठी घेतल्या. आ. रोहीत पवार यांनी जामखेड तालुक्यात विशेष लक्ष केंद्रित करून सर्व ठिकाणी मोठा फौजफाटा घेऊन भेटी दिल्या. सायंकाळी सहा वाजण्याच्या सुमारास ते कुसडगाव केंद्रावर येताच कार्यकर्त्यांनी एकच जल्लोष केला होता.
चौकट आ. रोहीत पवार यांच्या हळगाव येथील कारखान्यातील कृषी अधिकारी मधुकर मोहीते यास 47 हजार रुपये वाटताना भाजप कार्यकर्त्यांनी मंगळवारी सायंकाळी पकडले व पोलीसांच्या ताब्यात दिले. निवडणूक विभागाने त्यांच्यावर गुन्हा दाखल करून अटक केली. मंगळवारी हळगाव कारखान्याचा कर्मचारी मतेवाडी येथे पैसे वाटप करताना पकडला सदर कारवाई निवडणूक आयोगाने केली. यानंतर कर्जत येथील लकी हॉटेलवर आ. राम शिंदे यांचे नातेवाईक यांच्याकडे मोठ्या प्रमाणावर अनेक लाखात असलेली रक्कम व चिठ्ठ्यावर नावे आढळून आली याबाबत राष्ट्रवादी काँग्रेसने गुन्हा दाखल करण्याची मागणी पोलीस व निवडणूक विभागाकडे केली होती.
चौकट सरदवाडी येथील १५२ बुथ केंद्रावर आदर्श आचार संहिते वरून आक्षेप घेतल्यावरून राष्ट्रवादी काँग्रेस कार्यकर्ते ऋषीकेश रामभाऊ गंभीरे, रामभाऊ शामराव गंभीरे, ऋतीजा रामभाऊ गेभीरे यांच्यावर भाजपा कार्यकर्ते विनोद राजेंद्र गंभीरे, राम लाला गंभीरे, लखन लाला गंभिरे यांचाकडून प्राणघातक हल्ला करण्यात आला यामध्ये ऋषीकेश गंभीरे व रामभाऊ गंभीरे यांना जामखेड येथील ग्रामीण रुग्णालयात उपचारासाठी दाखल करण्यात आले. गंभीर जखमीमुळे प्राथमिक उपचारानंतर त्यांना खाजगी हॉस्पीटलमध्ये दाखल करण्यात आले अशी प्रथमिक माहिती असून जामखेड पोलीस स्टेशनला उशीरापर्यंत गुन्हा दाखल करण्याची प्रक्रिया सुरु आहे.
