सर्व महापुरुषांच्या जयंती साजऱ्या, मग भगवान बिरसा मुंडा यांचा विसर का? जामखेड नगरपरिषदेला आदिवासी पारधी महासंघाचा जाब लेखी उत्तरासाठी अल्टिमेटम, शुक्रवारी मोर्चाचा इशारा!
आदिवासी समाजाच्या अस्मितेचे प्रतीक, महान स्वातंत्र्यसेनानी आणि क्रांतिकारक भगवान बिरसा मुंडा यांच्या जयंतीनिमित्त जामखेड नगरपरिषद प्रशासनाकडून अधिकृत अभिवादनाचा कार्यक्रम आयोजित करण्यात न आल्याने नवा वाद निर्माण झाला आहे. या प्रकाराबद्दल आदिवासी पारधी महासंघाने तीव्र नाराजी व्यक्त केली असून, नगरपरिषद प्रशासनाला थेट जाब विचारत निवेदन सादर केले आहे. प्रशासनाने समाधानकारक लेखी उत्तर न दिल्यास शुक्रवारी नगरपरिषदेत येऊन जाब विचारण्याचा इशारा महासंघाने दिला आहे.
आदिवासी पारधी महासंघाचे प्रदेश सरचिटणीस प्रकाश माणिकराव काळे यांनी १७ नोव्हेंबर २०२६ रोजी नगरपरिषद मुख्याधिकारी यांना दिलेल्या निवेदनातून हा प्रश्न उपस्थित केला आहे. १५ नोव्हेंबर रोजी भगवान बिरसा मुंडा यांची जयंती होती. मात्र, जामखेड नगरपरिषदेकडून त्यांच्या प्रतिमेस अभिवादन करण्यासाठी कोणताही अधिकृत कार्यक्रम आयोजित करण्यात आल्याचे दिसून आले नाही, असे निवेदनात नमूद करण्यात आले आहे.
महापुरुषांच्या सन्मानात भेदभाव का? नगरपरिषदेमार्फत यापूर्वी विविध महापुरुषांच्या जयंती सन्मानपूर्वक साजऱ्या करण्यात आल्या आहेत. मग आदिवासी समाजाचे आराध्य दैवत आणि प्रेरणास्थान असलेल्या भगवान बिरसा मुंडा यांच्या जयंतीचा प्रशासनाला विसर कसा पडला? असा सवाल महासंघाने उपस्थित केला आहे.
भगवान बिरसा मुंडा यांनी इंग्रजांच्या अन्यायकारक राजवटीविरुद्ध संघर्ष करत आदिवासी समाजाच्या हक्कांसाठी, स्वाभिमानासाठी आणि अस्तित्वासाठी ऐतिहासिक लढा उभारला. त्यांच्या क्रांतिकारी विचारांनी देशातील असंख्य लोकांना प्रेरणा दिली आहे. अशा महान व्यक्तिमत्त्वाच्या जयंतीनिमित्त नगरपरिषदेकडून अभिवादनाचा कार्यक्रम न होणे ही खेदजनक बाब असल्याचे महासंघाने म्हटले आहे.
प्रशासनाकडे थेट प्रश्न महासंघाने आपल्या निवेदनातून मुख्याधिकाऱ्यांकडे दोन महत्त्वाचे प्रश्न उपस्थित केले आहेत. भगवान बिरसा मुंडा यांच्या जयंतीनिमित्त नगरपरिषदेकडून अधिकृत अभिवादन कार्यक्रम का आयोजित करण्यात आला नाही? तसेच त्यांच्या जयंतीकडे दुर्लक्ष होण्यामागचे नेमके कारण काय? याबाबत प्रशासनाने स्पष्ट भूमिका मांडावी, अशी मागणी करण्यात आली आहे.
लेखी उत्तर न दिल्यास शुक्रवारी नगरपरिषदेत जाब विचारणार! महापुरुषांचा सन्मान हा कोणत्याही एका समाजापुरता मर्यादित नसून तो संपूर्ण समाजाची सामूहिक जबाबदारी आहे. त्यामुळे या विषयाकडे प्रशासनाने केवळ औपचारिक बाब म्हणून न पाहता गांभीर्याने लक्ष द्यावे आणि गुरुवारपर्यंत लेखी उत्तर द्यावे, अशी मागणी प्रकाश माणिकराव काळे यांनी केली आहे. अन्यथा शुक्रवारी आदिवासी समाजाचे कार्यकर्ते आणि नागरिक नगरपरिषदेत उपस्थित राहून प्रशासनाला जाब विचारतील, असा स्पष्ट इशाराही निवेदनातून देण्यात आला आहे.
आता या निवेदनाची नगरपरिषद प्रशासन किती गांभीर्याने दखल घेते, मुख्याधिकारी यावर काय भूमिका मांडतात आणि आदिवासी समाजाच्या मागणीला काय उत्तर देतात, याकडे जामखेडकरांचे लक्ष लागले आहे.