संत साहित्य संमेलनात जामखेडचा डंका! प्रसिद्ध सूत्रसंचालक हनुमंत महाराज निकम यांचा गौरव!
मानाचा ‘संत पाईक गौरव पुरस्कार’ प्रदान
जामखेड येथील प्रसिद्ध सूत्रसंचालक हनुमंत महाराज निकम यांना अहिल्यानगर येथे आयोजित संत साहित्य संमेलनात मानाचा ‘संत पाईक गौरव पुरस्कार’ प्रदान करून गौरविण्यात आले. प.पू. महंत रामगिरीजी महाराज यांच्या शुभहस्ते हा पुरस्कार प्रदान करण्यात आला. या सन्मानामुळे जामखेडच्या शिरपेचात आणखी एक मानाचा तुरा रोवला गेला असून, परिसरातून त्यांच्यावर अभिनंदनाचा वर्षाव होत आहे.
मराठी भाषा विभाग, महाराष्ट्र शासन आणि महाराष्ट्र राज्य साहित्य व संस्कृती मंडळ यांच्या अनुदानातून तसेच आनंदोत्सव चॅरिटेबल ट्रस्ट यांच्या संयुक्त विद्यमाने या संत साहित्य संमेलनाचे आयोजन करण्यात आले होते. संत साहित्य, आध्यात्मिक विचार आणि सांस्कृतिक परंपरेचा जागर करणाऱ्या या संमेलनात विविध क्षेत्रांतील मान्यवरांची उपस्थिती लाभली.
या कार्यक्रमाला श्रीक्षेत्र गोदाधाम तथा सरला बेट येथील प.पू. महंत रामगिरीजी महाराज यांची प्रमुख उपस्थिती होती. राष्ट्रीय स्वयंसेवक संघाचे पश्चिम महाराष्ट्र प्रांत संघचालक नानासाहेब अण्णाजी जाधव, शास्त्रीय संगीत तज्ज्ञ पं. डॉ. विकास कशाळकर, महाराष्ट्र साहित्य परिषदेचे पुणे येथील अध्यक्ष तथा ज्येष्ठ रंगकर्मी योगेश सोमण, संमेलनाचे अध्यक्ष डॉ. अनिल सहस्रबुद्धे, स्वागताध्यक्ष सतीश तथा आबा मुळे आणि सह-स्वागताध्यक्ष प्राचार्य पंडित सर यांच्यासह अनेक संत-महंत आणि मान्यवर उपस्थित होते.
कार्यक्रमाचे सूत्रसंचालन माजी प्राचार्य श्रीकांत होशिंग यांनी केले. जामखेडच्या सांस्कृतिक क्षेत्राचा गौरव हनुमंत महाराज निकम हे जामखेडमधील प्रसिद्ध सूत्रसंचालक म्हणून परिचित आहेत. संत साहित्य संमेलनासारख्या प्रतिष्ठित व्यासपीठावर त्यांना ‘संत पाईक गौरव पुरस्कार’ मिळाल्याने जामखेडच्या सांस्कृतिक आणि आध्यात्मिक क्षेत्राच्या नावलौकिकात भर पडली आहे. त्यांच्या या सन्मानामुळे जामखेडकरांमध्ये आनंदाचे वातावरण निर्माण झाले आहे.
संत साहित्याच्या व्यासपीठावर मिळालेला हा सन्मान म्हणजे जामखेडच्या गौरवात भर घालणारी अभिमानास्पद बाब ठरली आहे.
