सात वर्षे झाली, तरी जामखेडच्या घशाला कोरड! उजनीच्या पाण्याची घोषणा, सुधारित मंजुरी अन् आश्वासनांचे गाठोडे, पंधरा दिवसांतून एकदा पाणी मिळत असल्याने नागरिक संतप्त
उजनीच्या पाण्याची घोषणा, सुधारित मंजुरी अन् आश्वासनांचे गाठोडे, पंधरा दिवसांतून एकदा पाणी मिळत असल्याने नागरिक संतप्त
जामखेड शहराच्या वाढत्या लोकसंख्येचा आणि विस्तारित शहराचा पाणीप्रश्न गेल्या सात वर्षांपासून प्रलंबित असून, उजनी धरणातून पाणी आणण्याची बहुप्रतिक्षित योजना अद्याप प्रत्यक्षात न आल्याने शहरवासीयांच्या अडचणी दिवसेंदिवस गंभीर होत आहेत. एकेकाळी चोवीस तास पाणीपुरवठा होणारे शहर म्हणून ओळख असलेल्या जामखेडमध्ये आज अनेक भागांत तब्बल पंधरा दिवसांतून एकदा पाणी मिळत असल्याने नागरिकांमध्ये तीव्र नाराजी व्यक्त होत आहे.
सन २०१९ मध्ये तत्कालीन आघाडी सरकारच्या काळात उजनी धरणातून जामखेड शहरासाठी पाणी आणण्याच्या योजनेला तत्त्वतः मान्यता मिळाल्याचे सांगितले गेले. त्यानंतर राज्यात सत्तांतर झाले आणि युती सरकारच्या काळात या योजनेसाठी सुधारित मंजुरीची प्रक्रिया पुढे आली. मात्र, सात वर्षांचा कालावधी उलटूनही योजनेचे प्रत्यक्ष काम अपेक्षित वेगाने सुरू झालेले नाही.
दरम्यानच्या काळात जामखेड शहराचा मोठ्या प्रमाणावर विस्तार झाला. नवीन वसाहती, वाढती लोकसंख्या आणि पाण्याची वाढती मागणी यामुळे सध्याची पाणीपुरवठा व्यवस्था अपुरी पडत आहे. शहराला सध्या भुतवडा तलावातून पाणीपुरवठा केला जातो; मात्र उपलब्ध पाणीसाठा आणि वाढती मागणी यामध्ये मोठी तफावत निर्माण झाली आहे.
भुतवडा तलाव शहरासाठी राखीव; तरीही शेतीपंप सुरूच?
भुतवडा तलावातील पाणी शहराच्या पाणीपुरवठ्यासाठी महत्त्वाचे असताना तलाव परिसरात सर्रास शेतीपंप सुरू असल्याची नागरिकांची तक्रार आहे. शहरासाठी राखीव असलेल्या पाण्यावर अशा प्रकारे उपसा सुरू राहिल्यास उपलब्ध पाणीसाठ्यावर आणखी ताण येत असून, शहराचा पाणीप्रश्न अधिक गंभीर होत असल्याचे नागरिकांचे म्हणणे आहे.
पंधरा दिवसांतून एकदा पाणी नागरिकांचे हाल सध्या जामखेड शहरात तीव्र पाणीटंचाई निर्माण झाली आहे. अनेक नागरिकांना पंधरा दिवसांतून एकदा पाणी मिळत असल्याने दैनंदिन गरजा भागविण्यासाठी मोठी कसरत करावी लागत आहे. पिण्याचे पाणी, घरगुती वापर, लहान व्यवसाय आणि इतर गरजांसाठी नागरिकांना पर्यायी व्यवस्था करावी लागत आहे.
एकेकाळी चोवीस तास पाणीपुरवठ्याची ओळख असलेल्या जामखेड शहराची आज पाण्यासाठी प्रतीक्षा करण्याची वेळ का आली, असा सवाल नागरिकांकडून उपस्थित केला जात आहे.
पाण्याच्या प्रश्नावर राजकारण, मात्र नागरिकांना हवे प्रत्यक्ष पाणी उजनीच्या पाण्याच्या योजनेवरून गेल्या काही वर्षांत विविध राजकीय पक्षांकडून श्रेयवाद आणि राजकीय आरोप-प्रत्यारोप होत आले आहेत. एका सरकारच्या काळात तत्त्वतः मान्यता, तर त्यानंतरच्या सरकारच्या काळात सुधारित मंजुरीची चर्चा झाली. मात्र नागरिकांच्या दृष्टीने महत्त्वाचा प्रश्न हा आहे की, मंजुरी आणि आश्वासनांनंतर प्रत्यक्ष पाणी जामखेडमध्ये कधी पोहोचणार?
सध्या जामखेडच्या पाणीप्रश्नाशी संबंधित राजकीय पातळीवर विधानपरिषदेचे सभापती प्रा. राम शिंदे, आमदार रोहित पवार तसेच विधानपरिषदेचे आमदार सुनील करजतकर यांच्यासारखे लोकप्रतिनिधी सक्रिय आहेत. त्यामुळे या सर्व लोकप्रतिनिधींनी पक्षीय राजकारण बाजूला ठेवून जामखेड शहराच्या पाणीप्रश्नासाठी एकत्रित प्रयत्न करून योजना तातडीने मार्गी लावावी, अशी मागणी नागरिकांमधून होत आहे.
‘मंजुरी कधी आणि प्रत्यक्ष काम कधी?’ जामखेड शहरासाठी उजनी धरणातून पाणी आणण्याची योजना सात वर्षांपासून चर्चेत आहे. शहराचा विस्तार आणि लोकसंख्या वाढत असताना भविष्यातील पाण्याची गरज लक्षात घेऊन ही योजना अत्यंत महत्त्वाची मानली जाते. त्यामुळे प्रशासकीय मंजुरी, निधी, तांत्रिक बाबी आणि इतर आवश्यक प्रक्रिया तातडीने पूर्ण करून प्रत्यक्ष कामाला सुरुवात करण्याची मागणी जोर धरत आहे.
शहरातील नागरिकांना आता केवळ आश्वासने नकोत, तर उजनीचे पाणी जामखेडपर्यंत प्रत्यक्ष कधी येणार, याची निश्चित वेळापत्रकासह कार्यवाही हवी आहे. पाणीप्रश्नावर सातत्याने राजकीय चर्चा आणि श्रेयवाद सुरू असताना नागरिकांच्या नळाला मात्र पाणी कधी येणार, हा प्रश्न अनुत्तरितच आहे.
