जामखेड न्युज – – – – –
गोरगरिबांच्या टपऱ्यांवर कारवाई, धनदांडग्यांच्या अतिक्रमणावर ‘मेहरबानी’ का?
१ ऑक्टोबरच्या टंचाई आढावा बैठकीत जामखेडकरांचा ‘निर्णायक’ सवाल!
कर्जत-जामखेड तालुक्यात निर्माण झालेल्या दुष्काळसदृश परिस्थितीच्या पार्श्वभूमीवर चारा व पाणीटंचाईचा आढावा घेण्यासाठी बुधवार, दि. १ ऑक्टोबर २०२६ रोजी जामखेड येथील राज लॉन्स येथे महत्त्वपूर्ण आढावा बैठक आयोजित करण्यात आली आहे. पालकमंत्री राधाकृष्ण विखे पाटील आणि महाराष्ट्र विधान परिषदेचे सभापती प्रा. राम शिंदे यांच्या प्रमुख उपस्थितीत ही बैठक होणार आहे.
पावसाने ओढ दिल्याने खरीप पिकांचे नुकसान झाले असून, पिण्याच्या पाण्याचा प्रश्न तसेच जनावरांच्या चाऱ्याची संभाव्य टंचाई यामुळे शेतकरी व पशुपालकांसमोर गंभीर परिस्थिती निर्माण झाली आहे. या पार्श्वभूमीवर शासनाकडून शेतकऱ्यांना कोणती मदत मिळणार, चारा व पाण्याची उपलब्धता कशी केली जाणार आणि टंचाईवर मात करण्यासाठी प्रशासन कोणत्या उपाययोजना करणार, याबाबत बैठकीत चर्चा होण्याची शक्यता आहे.
तालुक्यातील पाणीटंचाई, चारा उपलब्धता, खरीप पिकांचे नुकसान आणि शेतकऱ्यांना दिलासा देण्यासाठी आवश्यक उपाययोजनांचा प्रशासनाकडून आढावा घेतला जाणार आहे. त्यामुळे १ ऑक्टोबरच्या बैठकीत शासनाकडून कोणते निर्णय घेतले जातात, याकडे शेतकरी व पशुपालकांचे लक्ष लागले आहे.
अतिक्रमणाच्या प्रश्नावरही ‘जाब’ विचारला जाणार का?
दरम्यान, टंचाईच्या प्रश्नासोबतच जामखेड शहरातील अतिक्रमण आणि रखडलेल्या राष्ट्रीय महामार्गाचा प्रश्नही १ ऑक्टोबरच्या बैठकीत चर्चेला येणार का, असा सवाल जामखेडकरांमधून उपस्थित केला जात आहे.
