जामखेड न्युज – – – – –
प्राथमिक शिक्षिका ते सहाय्यक संचालक!
ज्योती बेल्हेकर यांची MPSC परीक्षेत दमदार कामगिरी, महिलांमध्ये राज्यात प्रथम क्रमांक!
जिद्द, मेहनत, सातत्यपूर्ण अभ्यास आणि ध्येयाप्रती असलेल्या निष्ठेच्या जोरावर यशाचे शिखर गाठता येते, हे ज्योती बेल्हेकर यांनी आपल्या कामगिरीतून सिद्ध केले आहे. प्राथमिक शिक्षिका म्हणून आपल्या सेवाकार्याची सुरुवात करून महिला व बालविकास अधिकारी पदापर्यंत मजल मारल्यानंतर त्यांनी महाराष्ट्र लोकसेवा आयोगाच्या (MPSC) परीक्षेद्वारे सहाय्यक संचालक पदापर्यंत झेप घेतली आहे. या परीक्षेत महिलांमध्ये राज्यात प्रथम क्रमांक मिळवल्याची माहिती असून, त्यांची अहिल्यानगर येथे नियुक्ती झाली आहे.
ज्योती बेल्हेकर यांचा हा प्रवास अनेक महिलांसाठी प्रेरणादायी ठरणारा आहे. शिक्षण क्षेत्रात प्राथमिक शिक्षिका म्हणून काम करताना त्यांनी प्रशासकीय सेवेत उच्च पदावर पोहोचण्याचे ध्येय समोर ठेवले. त्यासाठी अभ्यास, मेहनत आणि सातत्य यांच्या बळावर त्यांनी आपल्या कारकिर्दीत महत्त्वाचे टप्पे पार केले. त्यांच्या यशाबद्दल जामखेड, साकत, नेवासा, सोनई परिसरातून अभिनंदनाचा वर्षांव होत आहे.
महिला व बालविकास अधिकारी म्हणून काम करताना महिला आणि बालकांच्या कल्याणाशी संबंधित प्रशासकीय कामकाजाचा अनुभव त्यांना मिळाला. त्यानंतर महाराष्ट्र लोकसेवा आयोगाच्या परीक्षेच्या माध्यमातून सहाय्यक संचालक पदापर्यंत पोहोचत त्यांनी आपल्या यशाच्या शिरपेचात आणखी एक मानाचा तुरा रोवला.
महिलांमध्ये राज्यात प्रथम क्रमांक मिळविण्याची कामगिरी ही त्यांच्या मेहनतीचे आणि ध्येयाप्रती असलेल्या समर्पणाचे प्रतीक मानली जात आहे. प्राथमिक शिक्षिका ते अधिकारी आणि आता सहाय्यक संचालक असा त्यांचा प्रवास अनेक विद्यार्थिनी, महिला कर्मचारी आणि स्पर्धा परीक्षेची तयारी करणाऱ्या उमेदवारांना नवी प्रेरणा देणारा आहे.
