जामखेड न्युज – – – – – –
“महाराष्ट्राला शंभर तुकाराम मुंढे हवेत, तरच राज्य भ्रष्टाचारमुक्त होईल”
“प्रामाणिक अधिकारी हेच लोकशाहीचे खरे आधारस्तंभ”
अन्न व औषध प्रशासन (FDA) विभागाने दूध भेसळखोरांविरोधात राज्यभरात धडक मोहीम हाती घेतली आहे. सोलापूरमधील माळशिरस येथे तब्बल ९९७ किलो पामतेल आणि अहिल्यानगरमध्ये हजारो लिटर बनावट दूध तयार करणारे मोठे रॅकेट जप्त करण्यात आले आहे. भेसळीमुळे राज्यातील दूध संकलनात मोठी घट झाली आहे. भेसळ रोखण्यासाठी FDA आयुक्त तुकाराम मुंढे यांच्या नेतृत्वाखाली महाराष्ट्रात कडक तपासणी आणि कारवाया सुरू आहेत. अहिल्यानगर (जामखेड) सह अनेक जिल्ह्यांत घातक रसायने व पॅराफिन वापरून बनावट दूध तयार करणारे गुन्हेगार पकडले गेले आहेत. या कारवायांचा धसका घेऊन अनेक अनधिकृत केंद्रांवर टाळे ठोकण्यात आले आहे.
अहिल्यानगर व पुणे जिल्ह्यात २ कोटींचे दुध भेसळ रॅकेट उघडकीस आल्यानंतर राज्यभरात खळबळ उडाली आहे. लहान मुलांच्या जीवाशी खेळ करणाऱ्या या टोळीवर तात्काळ कारवाई करत १२ जणांना अटक करणाऱ्या अन्न व औषध प्रशासनाच्या पथकाचे कौतुक होत असतानाच, “अशा कारवाया रोज व्हायला हव्यात. त्यासाठी महाराष्ट्राला शंभर तुकाराम मुंढे सारखे कर्तव्यनिष्ठ, धडाडीचे अधिकारी हवेत. तरच महाराष्ट्र खऱ्या अर्थाने भ्रष्टाचारमुक्त होईल” अशी मागणी नागरिकांमधून जोर धरत आहे.
दुध भेसळीचा धक्कादायक पर्दाफाश:
डेअऱ्यांवरील छाप्यात काय आढळले?
1. कपडे धुण्याची सोडा, युरिया, स्किम्ड मिल्क पावडर व पाम तेल वापरून सिंथेटिक दूध बनवले जात होते.
2. १ लिटर शुद्ध दुधात ५ लिटर भेसळयुक्त दूध मिसळून ‘ताजे दूध’ म्हणून विक्री.
3. दररोज १८ हजार लिटर विषारी दूध पुणे, मुंबई, नगरच्या बाजारात जात होते.
4. लहान मुलांना किडनी फेल, कॅन्सर, आतड्यांचे आजार होण्याचा धोका डॉक्टरांनी व्यक्त केला.
“हे रॅकेट ३ वर्षे बिनबोभाट सुरू होते. स्थानिक अधिकाऱ्यांना ‘हप्ते’ जात होते. तुकाराम मुंढे सारखा एक अधिकारी असता तर ३ दिवसांत सगळे डेअरीवाले तुरुंगात गेले असते. सामान्य माणसाच्या मुलांच्या जीवाशी खेळ खपवून घेतला नसता” अशी संतप्त प्रतिक्रिया जामखेडच्या बालरोगतज्ज्ञाने दिली.
‘मुंढे पॅटर्न’ म्हणजे काय?
तुकाराम मुंढे यांनी आयुक्त असताना अतिक्रमणे हटवणे, टेंडर प्रक्रिया ऑनलाइन करणे, स्वतः रस्त्यावर उतरून पाहणी करणे यामुळे ‘जनतेचा अधिकारी’ ही प्रतिमा मिळवली. “नो पॉलिटिकल प्रेशर, ओन्ली पब्लिक वेल्फेअर” हे त्यांचे सूत्र होते.
भ्रष्टाचारमुक्तीसाठी ‘१०० मुंढे फॉर्म्युला’:
सामाजिक कार्यकर्ते विश्वास काटकर म्हणाले, “समजा प्रत्येक जिल्ह्यात ३ मुंढे मिळाले तरी ३६ जिल्हे x ३ = १०८ अधिकारी होतील.
-आरटीओमध्ये लायसन्ससाठी लाच बंद होईल.
– महापालिकेत रस्त्याची कामे दर्जेदार होतील.
– FDA मध्ये अन्न भेसळ करणाऱ्यांची गय केली जाणार नाही. म्हणजेच महाराष्ट्र आपोआप भ्रष्टाचारमुक्त होईल.”
